ខេត្តរតនគិរី ៖ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត រួមជាមួយអនុគណៈគណៈកម្មាធិការរៀបចំពិធីប្រារព្វទិវាមនុស្សចាស់កម្ពុជា និងទិវាមនុស្សចាស់អន្តរជាតិ ០១តុលា ឆ្នាំ២០២៤ ក្រោមប្រធាន
បទ  ”មនុស្សចាស់ក្នុងបរិវត្តកម្មឌីជីថល” ។

កម្មពិធីនេះ រៀបចំធ្វើឡើងយ៉ាងមហោឡារិក នៅសាលមហោស្រពរតនគិរី នាព្រឹកថ្ងៃទី១៧ ខែតុលា ឆ្នាំ២០២៤ ក្រោមអធិបតីភាពឯកឧត្តម ភូ គឹមមឿ សមាជិកក្រុម
ប្រឹក្សាខេត្ត តំណាងឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត និងលោក ខ័ណ្ឌ ចំណាន  អភិបាលខេត្តស្តីទី តំណាងឯកឧត្តម ញ៉ែម សំអឿន អភិបាលខេត្តរតនគិរី។

ថ្លែងសំណេះសំណាលជាមួយលោកយាយ លោកតា អ៊ុំ ពូ មីង ៤35នាក់ ដែលបានចូលរួម នាឱកាសនេះ លោក ខ័ណ្ឌ ចំណាន បានចាត់ទុក
ការប្រារព្ធពិធីអបអរសាទរ ទិវាមនុស្សចាស់អន្តរជាតិ និង មនុស្សចាស់កម្ពុជា ០១តុលា ឆ្នាំ២០២៤ ក្រោមប្រធានបទ”មនុស្សចាស់ក្នុងបរិវត្តកម្ម ឌីជីថល គឺជាទិវាមួយសម្រាប់រំលឹកគុណមនុស្សចាស់ នៅទូទាំងសកលលោក និងសម្រាប់លើកកម្ពស់មនសិការ ទទួលខុសត្រូវរបស់យើង ចំពោះមនុស្សចាស់ ក្នុងការចូលរួមកសាងសង្គមជាតិ មួយ ដែលមានការយកចិត្តទុកដាក់ខ្ពស់ ដល់សុខុមាលភាពរបស់ប្រជាជនគ្រប់វ័យ ពិសេសមនុស្សវ័យចាស់។ ជាការពិតណាស់ចាប់តាំងពីក្រោយថ្ងៃរំដោះ ៧មករា ឆ្នាំ១៩៧៩មក គោលនយោបាយជាតិ មានជាបន្តបន្ទាប់ជាអាទ៍ ការផ្ដល់ជូននូវរបបសន្តិសុខសង្គម សម្រាប់មន្ត្រីរាជការស៊ីវិល កងកម្លាំងប្រដាប់អាវុធ កម្មករនយោជិត ការបង្កើតមូលនិធិជនពិការ របបគោលនយោបាយចំពោះជនពិការក្រីក្រតាមសហគមន៍ មូលនិធិជាតិជំនួយសង្គម ច្បាប់ស្ដីពីរបបសន្តិសុខសង្គម ។
លោកបន្តថា ជាក់ស្តែងនីតិកាលទី៧ នៃរដ្ឋសភា រាជរដ្ឋាភិបាលបាន ដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលក្នុងនោះការអភិវឌ្ឍវិស័យសង្គមកិច្ច ជាអទិភាពសំខាន់មួយ នៅក្នុងបញ្ចកោណទី១”ការអភិវឌ្ឍធនធានមនុស្ស និងក្នុងមុំទី៤“ការពង្រឹងប្រព័ន្ធគាំពារសង្គម ព្រមទាំងប្រព័ន្ធស្បៀង ដែលមានគោលដៅជាយុទ្ធសាស្ត្រគឺ ការកសាង និងការអភិវឌ្ឍប្រព័ន្ធគាំពារសង្គមអោយមានលក្ខណៈប្រមូលផ្តុំ និងសង្គតិភាព ទាំងក្នុងប្រព័ន្ធ
សន្តិសុខសង្គម ប្រព័ន្ធជំនួយសង្គម ការពង្រឹងប្រព័ន្ធស្បៀងដែលផ្តល់ សន្តិសុខស្បៀង និងអាហារូបបត្ថម្ភ សម្រាប់ប្រជាជនគ្រប់រូប។ មនុស្សចាស់ គឺជា
ធនធានដ៏មានសារៈសំខាន់បំផុត លោកបានផ្តល់នូវចំណេះដឹង និងផ្ទេរនូវបទពិសោធន៍ ដ៏ច្រើនលើសលប់សម្រាប់មនុស្សជំនាន់ក្រោយៗ ។ មនុស្សចាស់បានធ្វើពលីកម្មគ្រប់បែបយ៉ាងដើម្បីថែរក្សាទុកនូវ សមិទ្ធិផលជាតិ និងស្នាដៃជាប្រវត្តិសាស្ត្រសម្រាប់មនុស្សជាតិ។ ចំណុចទាំងអស់នោះ យើងអាចមើលឃើញថា មរតកទាំងអស់នេះ មិនអាចកាត់ផ្តាច់បាននូវគុណូបការៈប្រកបដោយគតិបណ្ឌិត ការអប់រំប្រៀនប្រដៅ និងស្នាដៃ នៃបុព្វបុរស និងមនុស្សចាស់របស់យើងបានឡើយ។ ជាងនេះទៅទៀត ព្រឹទ្ធឱវាទ និងដំបូន្មានចាស់ទុំ គឺជាផ្នែកមួយនៃ មូលដ្ឋានគ្រឹះដ៏រឹងមាំ ក្នុងការអប់រំសីលធម៌ និងចរិយាធម៌ របស់សង្គមជាតិកម្ពុជាយើង។

យោងតាមការឲ្យដឹងពីលោក ហ៊ត ស៊ុនហោ បានឲ្យដឹងផងដែរថា ក្នុងឱកាសនៃទិវាមនុស្សចាស់កម្ពុជា និងទិវាមនុស្សចាស់អន្តរជាតិ ០១ តុលា ឆ្នាំ
២០២៤នេះ មន្ទីរសង្គមកិច្ច អតីតយុវជនខេត្ត បានរៀបចំណងដៃជូនដល់ លោកតា លោកយាយ ដែលជាសមាជិកមនុស្សចាស់ទាំង ៤៣៥នាក់ ក្នុងម្នាក់ទទួលបានថវិកា៣ម៉ឺនរៀល និងមី ១កេស និងអាវ១ផងដែរ៕ ដោយ ភួង ផុន