ខេត្តរតនគិរី៖ នៅព្រឹកថ្ងៃទី០៨ ខែតុលា ឆ្នាំ២០២៤នេះ ឯកឧត្តម ញែ៉ម សំអឿន អភិបាលនៃគណៈអភិបាលខេត្តរតនគិរី និងឯកឧត្តមអភិបាលរងខេត្ត លោកអភិបាលក្រុងបានលុង និងប្រធានមន្ទីរពាក់ព័ន្ធមួយចំនួន បានអញ្ជើញចូលរួមក្នុងពិធីបើកកញ្ចប់វិញ្ញាសា ប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី០៨-០៩ខែតុលា ឆ្នាំ២០២៤ នៅមណ្ឌលប្រឡងវិទ្យាល័យសម្តេចឪ-សម្តេចម៉ែ ក្រុងបានលុង។

លោក ខាត់ សាម៉ាល់ ប្រធានមន្ទីរអប់រំយុវជន និងកីឡា ខេត្តរតនគិរី បានអោយដឹងថា ដំណើរការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ខេត្តរតនគិរី សម័យប្រឡង២០២៣-២០២៤នេះ មានចំនួន ៣មណ្ឌល ស្មើរ ៧០បន្ទប់ គឺមណ្ឌលប្រឡងអនុវិទ្យាល័យ ប៊ូ ថង ទេសអន្លុង មណ្ឌលប្រឡងវិទ្យាល័យ សម្ដេចឪ សម្ដេចម៉ែ មណ្ឌលប្រឡងវិទ្យាល័យ ហ៊ុន សែន ភូមិថ្មី ។
១,មណ្ឌលប្រឡងអនុវិទ្យាល័យ ប៊ូ ថង ទេសអន្លុង មានថ្នាក់វិទ្យាសាស្ត្រចំនួន ១០បន្ទប់ មានបេក្ខជនសរុប ២៤០នាក់ ស្រី១៤០។
២,មណ្ឌលប្រឡងវិទ្យាល័យ សម្ដេចឪ សម្ដេចម៉ែ ថ្នាក់វិទ្យាសាស្ត្រសង្គម ចំនួន ៣២បន្ទប់ មានបេក្ខជនចំនួន ៨០នាក់ ស្រី ៤០៤នាក់។
៣,មណ្ឌលប្រឡងវិទ្យាល័យ ហ៊ុន សែន ភូមិថ្មី ថ្នាក់វិទ្យាសាស្ត្រសង្គម ចំនួន ២៨បន្ទប់ មានបេក្ខជនសរុបចំនួន ៦៩២នាក់ ស្រី ៣៣១នាក់។

ក្នុងការអញ្ជើញបើកវិញ្ញាសាប្រឡងនោះ ឯកឧត្តម ញ៉ែម សំអឿន បានលើកទឹកចិត្តដល់ក្មួយៗ ដែលជាបេក្ខជន បេក្ខនារីទាំងអស់ ត្រូវខិតខំធ្វើអោយអស់លទ្ធភាព តាំងចិត្តយកចំណេះដឹងមកធ្វើកិច្ចការប្រឡង សរសេរអោយបានស្អាត សម្រួលអារម្មកុំមានការភិតភ័យ ថែរក្សាសុខភាពអោយបានល្អ និងធ្វើដំណើរមានការប្រុងប្រយ័ត្ន។ ទន្ទឹមនឹងនេះ ឯកឧត្ដមក៏សូមជូន
ពរ ប្រឡងជាប់និទ្ទេសល្អៗ ទាំងអស់គ្នា។ ឯកឧត្តម បានបញ្ជាក់ថា ការប្រឡង គឺក្រសួងអប់រំ យុវជន និងកីឡា បានធ្វើការរឹតបន្តឹងដល់បេក្ខជន បេក្ខនារី ដើម្បីធ្វើយ៉ាងណាអោយវិស័យអប់រំនៅកម្ពុជា មានគុណភាព មានន័យថា អ្នកចេះ គឺជាប់។

នៅតាមមណ្ឌលប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) នេះដែរ គេសង្កេតឃើញកម្លាំងកងរាជអាវុធហត្ថ កម្លាំងស្នងការរដ្ឋាននគរបាលខេត្ត និងកម្លាំង ស.ស.យ.ក ខេត្តបានជួយរៀបចំកន្លែងផ្ញើរម៉ូតូដោយមិនគិតថ្លៃ ការពារសន្តិសុខ រៀបចំសណ្ដាប់ ព្រមទាំសម្រួលចររាចរណ៍ជូនប្អូនៗ ក្មួយៗ ជាបេក្ខជនប្រងផងដែរ។ មិនត្រឹមតែប៉ុណ្ណោះ អាណាព្យាបាល និងក្រុមគ្រួសារ បានលើកទឹកចិត្តដល់ប្អូនៗ ក្មួយៗ ជូនមកប្រឡង ព្រមទាំងវិចបាយមកបរិភោគ រងចាំនៅក្រៅរបងទៀតផង៕ ដោយ ភួង ផុន