ខេត្តរតនគិរី៖ សមាគមថ្នាលយុវជនកម្ពុជា បានបង្កើតឡើងដើម្បីជាជំនួយដល់ជនក្រីក្រ ជាពិសេស គឺរួមចំណែកការពារសុខសន្តិភាព បម្រើគណៈបក្សប្រជាជនកម្ពុជា ហើយសមាគមនេះនឹងបង្កើតរីកដុះដាលទូទាំងប្រទេស។

ដោយឡែកនៅខេត្តរតនគិរី ទើបបង្កើតឡើងរយៈពេលប៉ុន្មានខែប៉ុណ្ណោះ ហើយនៅព្រឹកថ្ងៃទី២៨ ខែកក្កដា ឆ្នាំ២០២៤ សមាគមថ្នាលយុវជនកម្ពុជាខេត្តរតនគិរី បានរៀបចំពិធីប្រកាសតែងតាំងតួនាទីភារកិច្ច ជូនថ្នាក់ដឹកនាំសមាគមក្នុងខេត្ត និងតាមបណ្ដាស្រុក ព្រមទាំងសំណេះសំណាល ជាមួយសមាជិក សមាជិកាក្នុងសមាគមថ្នាលយុវជនកម្ពុជាក្នុងខេត្តរតនគិរីផងដែរ។ ពិធីនេះបានរៀបចំឡើងនៅស្នាក់ការសមាគម ស្ថិតក្នុងភូមិថ្មដា សង្កាត់បឹងកន្សែង ក្រុងបានលុង ខេត្តរតនគិរី ក្រោមអធិបតីភាព លោក ម៉ៅ ផល្លា ប្រធានប្រតិបត្តិសហគមថ្នាលយុវជនកម្ពុជា ស្នាក់ការកណ្ដាល និងលោក វ៉ាន់ សោភា អភិបាលរងខេត្តរតនគិរី ព្រមទាំងមានការចូលរួមពីសំណាក់សមាជិក សមាជិកា និងប្រធានសមាគមថ្នាលយុវជនកម្ពុជាសាខាតាមបណ្ដាខេត្តផងដែរ។

សំណេះសំណាលនាឱកាសនេះ លោក វ៉ាន សោភា អភិបាលរងខេត្តរតនគិរី បានលើកឡើងពីបញ្ហាប្រឈមនៃការងារចំពោះ លោកថា ការងារអ្វីក៏ដោយ ត្រូវតែមានបញ្ហាប្រឈមទាំងអស់មិនថាតិច ឬច្រើនឡើយ។ យ៉ាងណាមិញបងប្អូនទាំងអស់ក្នុងសមាគម ត្រូវតែតស៊ូពុសពារ ដើម្បីសុខសន្តិភាព ប្រឆាំងរាល់ការញួសញុង ដូចជារាជរដ្ឋាភិបាល បានដាក់ខេត្តទាំង៤ នៅភូមិភាគឥសាន្ត ជាតំបន់សេដ្ឋកិច្ចជាមួយប្រទេសឡាវ និងវៀតណាម បែរជាមានពាក្យញួសញុងថា កាត់ខេត្តទាំងបួននៅភូមិភាគឥសាន្ត អោយទៅប្រទេសវៀតណាមទៅវិញ។ លោកអភិបាលរងខេត្តបានបន្តថា ចុះបើកាត់ខេត្តរតនគិរី ស្ទឹងត្រែង មណ្ឌលគិរី និងខេត្តក្រចេះ ឲ្យទៅវៀតណាម ហេតុអីប្រជាពលរដ្ឋទាំង៤ខេត្ត នៅស្ងាត់ស្ងៀម ក្រែងប្រជាពលរដ្ឋទាំង៤ខេត្ត សុទ្ឋតែជនជាតិខ្មែរដែរតើ នេះជាការញួសញុងមិនសមហេតុ មិនសមផល យើងត្រូវតែប្រឆាំងដាច់ខាត ហើយយើងទាំងអស់គ្នាត្រូវតែនាំគ្នាអបអរសាទរ គាំទ្រការបើកការរដ្ឋានព្រែកជីកហ្វូនណនតេជោ នាថ្ងៃទី៥ ខែសីហា ឆ្នាំ២០២៤ ខាងមុខនេះ ដែលជាសមិទ្ធិផលប្រវត្តសាស្ត្រ ដ៏ត្រចះត្រចង់របស់កម្ពុជា ជាសសៃឈាមសេដ្ឋកិច្ចរបស់របស់ប្រជាជនកម្ពុជា នាថ្ងៃខាងមុខ និងទៅអនាគត សម្រាប់កូនចៅយើងទាំងអស់គ្នានៅជំនាន់ក្រោយៗទៀត។

បន្ទាប់ពីប្រគល់លិខិតតែងតាំង ដល់ថ្នាក់ដឹកនាំសមាគមថ្នាល់យុវជនកម្ពុជា សាខាខេត្តរតនគិរី និងតាមបណ្ដាស្រុកក្នុងខេត្តរតនគិរីរួចមក លោកប្រធានសមាគម ក៏បានបញ្ជាក់ថា ថ្វីត្បិតសមាគមនេះ នៅមិនទាន់មានសាខាគ្រប់ខេត្តពិតមែន ក៏ប៉ុន្តែសាខារបស់សមាគមនេះ នឹងដាក់ពង្រាយទូទាំងប្រទេសកម្ពុជា បើទោះជានៅខេត្តចំនួន ២ មិនទាន់មានសាខាយ៉ាងណាក៏ដោយ។ ហើយគោលដៅសំខាន់របស់សមាគមថ្នាលយុវជនកម្ពុជា គឺរួមចំណែកជាមួយរាជរដ្ឋាភិបាល ក្នុងការការពារសុខសន្តិភាព ស្ថេរភាពសង្គម ប្រឆាំងដាច់ខាតរាល់ការកាប់ពណ៌មកលើរាជរដ្ឋាភិបាល ជាពិសេសប្ដេជ្ញាចិត្ត ស្មោះស្ម័គ្រអស់ពីបេះដូង បំរើរាល់សកម្មភាពរបស់គណបក្សប្រជាជនកម្ពុជា បំរើរាជរដ្ឋាភិបាលស្របច្បាប់៕ ដោយ ភួង ផុន