ខេត្តរតនគិរី ៖ ស្នងការរង នៃស្នងការរដ្ឋាននគរបាលចំនួនបួនខេត្ត ត្រូវបានបើកវគ្គបំប៉នជំនាញការងារដឹកនាំ ដើម្បីបង្កើនចំណេះដឹង លើកកម្ពស់ប្រសិទ្ធភាពដឹកនាំ កងកម្លាំងមន្ត្រីយុត្តិធម៌។ ការរៀបចវគ្គបំប៉ននេះ ស្របតាមផែនការ របស់អគ្គស្នងការរដ្ឋាននគរបាលជាតិ ជូនដល់ស្នងការរងតាមបណ្ដារាជធានី ខេត្ត ។ ទើបថ្ងៃនេះស្នងការរដ្ឋាននគរបាលខេត្តរតនគិរី បានរៀបចំបើកវគ្គនេះឡើង។

ពិធីបើកវគ្គនេះ បានរៀបចំឡើងនាព្រឹកថ្ងៃទី៦ ខែកក្កដា ឆ្នាំ២០២៤ នៅស្នងរដ្ឋាននគរបាលខេត្តរតនគិរី ក្រោមអតីភាព ឯកឧត្ដម ឧត្ដមសេនីយ៍ឯក តាន់ សំណាង អគ្គស្នងការរង ទទួលការងារបុគ្គលិក និងធនធានមនុស្ស តំណាងដ៏ខ្ពង់ខ្ពស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ ឯកឧត្ដម ឧត្ដមសេនីយ៍ឯក ស៊ីម សារ៉ាត់ អនុប្រធាននាយកដ្ឋានកណ្ដាលសន្តិសុខ លោកឧត្ដមសេនីយ៍ទោ អ៊ុង សុភាព ស្នងការនគរបាលខេត្តរតនគិរី លោកស្នងការនគរបាលខេត្តស្ទឹងត្រែង ខេត្តមណ្ឌលគីរី ព្រមទាំងលោកស្នងការខេត្តក្រចេះផងដែរ។ វគ្គបំប៉ននេះ មានរយៈពេល ៥ថ្ងៃ គឺចាប់ពីថ្ងៃទី៦ ខែកក្កដា ដល់ថ្ងៃទី១០ ខែកក្កដា ឆ្នាំ២០២៤ ដែលមានស្នងការរង មកពីខេត្តរតនគិរី ខេត្តស្ទឹងត្រែង ខេត្តមណ្ឌលគីរី និងខេត្តក្រចេះ។

ក្នុងឱកាសបើកវគ្គនេះដែរ លោក អ៊ុង សុភាព ស្នងការនគរបាលខេត្តរតនគិរី បានមានប្រសាសថា ដោយអនុវត្តតាមផែនការលេខ ១៥០ ផក ចុះថ្ងៃទី១១ ខែមិថុនា ឆ្នាំ២០២៤ របស់អគ្គស្នងការរដ្ឋាននគរបាលជាតិ ស្ដីពីការរៀបចំបើកវគ្គបំប៉នការងារដឹកនាំដល់ស្នងការរង នៃស្នងការរាជធានី-ខេត្ត។ ហើយបទឧទ្ទេសនាម ដោយលោកគ្រូមានជំនាញ និងមានបទពិសោធន៍ច្រើនឆ្នាំ ដែលអគ្គស្នងការរដ្ឋាននគរបាលជាតិបានចាត់បញ្ជូនមកក្នុងគោលបំណងលើកកម្ពស់ប្រសិទ្ធភាពការងារដឹកនាំតាមជំនាញ និងបង្កើនសមត្ថភាពដល់ថ្នាក់ស្នងការរង ក្នុងការបំពេញតួនាទីបញ្ជាដឹកនាំសំដៅឆ្លើយតបទៅនឹងស្ថានភាពជាក់ស្ដែង ដើម្បីពង្រឹង ថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថភាពសង្គម។ ទាំងនេះបញ្ជាក់ឲ្យឃើញពីការយកយកចិត្តទុកដាក់ពីថ្នាក់ដឹកនាំអគ្គស្នងការនគរបាលជាតិ ស្របតាមយុទ្ធសាស្ត្របញ្ចកោណតំណាក់កាលទីមួយ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតដ៏ឆ្លៀសវៃ របស់សម្ដេចមហាបវរធិបតី ហ៊ុន មាណែត នាយករដ្ឋមន្ត្រីនៃព្រះរាជាណាចក្រកម្ពុជា៕ ដោយ ភួង ផុន