លោក សំ តាំហន ត្រូវបានប្រជាពលរដ្ឋប្តឹងរឿងទំនាស់ដីធ្លី បំផ្លាញសំយ៉ាប ដាក់ស្ទាវឈរជើង

ខេត្តព្រះសីហនុ៖ លោកពូ ស៊ុន សឿង អាយុ៧៦ ឆ្នាំ បានកើតទុក្ខមិនសុខចិត្តស្នើរសុំដល់ក្រសួងបរិស្ថានមេត្តាជួយពិនិត្យមើលបុគ្គលមួយរូប ដែលកាន់ ស ជ ណ លេខ២១១៥ សជណ ប.ស្ថ ចុះថ្ងៃទី២២ ខែកក្កដា ឆ្នាំ២០២៣ ចេញដោយក្រសួងបរិស្ថាន មកអាកាត់យកដីរបស់គាត់យកទៅចែកឲ្យអ្នកដទៃទាំងបំពាន ដោយមិនឃើញមានឧបសម្ព័ន្ធ គ្មាន និយាមការភ្ជាប់ ។

គាត់ថា ដីមួយកន្លែងមុខព្រលានយន្តហោះកងកេង ស្ថិតនៅភូមិថ្មធំ ឃុំរាម  ស្រុកព្រៃនប់ ជាដីរបស់គាត់បានកាន់កាប់ជាយូរឆ្នាំមកហើយ ព្រមទាំងមានអ្នកភូមិ និងអាជ្ញាធរឃុំ នៅទីនេះបានដឹងឮ គឺគាត់បានទិញគេតាំងតែពីឆ្នាំ១៩៩៣ មកម្ល៉េះ មាន ទទឹង៣៨ បណ្តោយ៥០ម៉ែត្រ ។

ស្រាប់តែថ្មីៗនៅចុងឆ្នាំ២០២៣ កន្លងទៅនេះ មានបុគ្គលមួយរូប ឈ្មោះ សំ តាំហន បានកាន់ស.ជ.ណ របស់ក្រសួងបរិស្ថាន ដោយតាំងខ្លួនជាអ្នកការពារផលប្រយោជន៍ឲ្យប្រជាពលរដ្ឋ  និងទទួលបានការចាត់តាំង ពីថ្នាក់ដឹកនាំជាន់ខ្ពស់ ចុះបែងចែកដីឡូត៍ជូនប្រជាពលរដ្ឋចំនួន៨៩គ្រួសារ ដោយកាត់យកទាំងដីរបស់លោកដែលបានកាន់កាប់ជាច្រើនឆ្នាំមកហើយផង​ដែរ ។

គាត់បានបញ្ជាក់ទៀតថា នៅពេលថ្មីៗនេះលោកបានជួលឡានស្ទូចដើម្បីស្ទូចប្ដូរកុងតឺន័រ ដែលជ្រាបទឹក ប៉ុនែ្តបែបជាឈ្មោះ សំ តាំហន នាំមនុស្សមកពីណាទេមកហាមឃាត់ ដោយចោទមកលោកថាយកទូរកុងតឺន័រមកបិទផ្លូវទៅវិញ ដែលជារឿងមិនសមហេតុផលទាល់តែសោះ ។ ហើយមកដល់ពេលនេះមានក្មេងទំនើងប្រមាណជិត២០នាក់កំពុងប្រមូលផ្ដុំគ្នានៅក្នុងទូរកុងតឺន័ររបស់លោក មិនដឹងថាក្មេងទំនើងទាំងអស់នេះមកពីណា ឬមានបំណងយ៉ាងណាមកលើលោកនោះទេ ចំណែកលោក ហន ដេញឲ្យគាត់ប្តឹងរហូត។

ពាក់ព័ន្ធនឹងបញ្ហានេះ លោក គីម ចាន់ មេឃុំរាម បានឲ្យដឹងតាមទូរស័ព្ទថា ដីទំនាស់រវាងស៊ុន សឿង និង លោក សំ តាំហន ជាដីស្ថិតនៅក្នុងអនុក្រឹក្យលេខ ២៤២ ស្តីពីការកំណត់ និងការបែងចែកតំបន់គ្រប់គ្រង ក្នុងឧទ្យានជាតិសមុទ្រព្រះសីហនុរាម ខេត្តព្រះសីហនុ ។

លោកមេឃុំរាម បានឲ្យដឹងតាមទូរស័ព្ទទៀតថា ចំពោះបងប្អូនប្រជាពលរដ្ឋដែលមានដីនៅទីនោះមិនត្រូវមានទំនាស់នឹងគ្នានោះទេ ហើយបើសិនជាមានអ្វីសំអាងសូមស្នើរសុំទៅតាមអនុក្រឹត្យលេខ២៤២ ។ ចំពោះរឿង ស ជ ណ ចេញដោយក្រសួងបរិស្ថាន ដែលលោកតាំង សំហន យកមកអះអាងនេះ លោកមិនដឹងទេ សូមសួរទៅក្រសួងបរិស្ថានវិញទើបដឹង ។

ចំណែក លោក តាំង សំហន ដែលកាន់ស.ជ.ណ របស់ក្រសួងបរិស្ថាន បានឲ្យដឹងដែរថា លោកជាអ្នកការពារផលប្រយោជន៍ឲ្យប្រជាពលរដ្ឋ  និងទទួលបានការចាត់តាំង ពីថ្នាក់ដឹកនាំជាន់ខ្ពស់ ចុះបែងចែកដីឡូត៍ជូនប្រជាពលរដ្ឋចំនួន៨៩គ្រួសារដែលមានទីតាំងខាងលើ ។ ចំពោះឈ្មោះ ស៊ុន សឿង ដែលអះអាងថាដីឡូA1 A2 និង B1 B2 ជាដីរបស់លោក ក្នុងនាមលោកជាអ្នកការពារផលប្រយោជន៍ឲ្យប្រជាពលរដ្ឋ សូមឲ្យឈ្មោះ ស៊ុន សឿង ប្ដឹងទៅក្រសួងបរិស្ថានទៅ ។

គួរបញ្ជាក់ថា យោង ស ជ ណ លេខ២១១៥ សជណ ប.ស្ថ ចេញដោយក្រសួងបរិស្ថាន បានប្រកាសកំណត់តំបន់ធ្វើការវិនិច្ឆ័យចុះបញ្ជី លក្ខណៈជាប្រព័ន្ធ បន្តនីតិវិធីនៃការធ្វើវិញ្ញាបនបត្រសម្គាល់ម្ចាស់អចលនទ្រព្យជូនប្រជាពលរដ្ឋ ស្ថិតនៅក្នុង ភូមិសាស្ត្រ ភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ដែលមានវិសាលភាពស្ថិតក្នុងតំបន់សហគមន៍ នៃឧទ្យានជាតិសមុទ្រព្រះសីហនុរាម និងផ្តល់ជូននូវទិន្នន័យភូមិសាស្ត្រតំបន់សហគមន៍នៃឧទ្យានជាតិសមុទ្រ ព្រះសីហនុរាមមួយផ្នែកក្នុងភូមិសាស្ត្រ ភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ សម្រាប់ជាមូលដ្ឋាន ក្នុងការចុះកំណត់តំបន់ធ្វើការវិនិច្ឆ័យរួម (ការចុះបញ្ជីដីធ្លីមានលក្ខណៈជាប្រព័ន្ធ) ៕