ខេត្តសៀមរាប កំលាំងអាវុធហត្ថ បានបើកប្រតិបត្តិការ ចាប់ខ្លួនមនុស្សពីរនាក់ នៅសៀមរាប ពាក់ព័ន្ធករណីចោរប្លន់ថៅកែគ្រឿងសំណង់ឧត្តរមានជ័យការបង្ក្រាបនោះធ្វើឡើង នៅវេលាម៉ោង២០:០០នាទីថ្ងៃទី២៦​ ខែឧសភា​ ឆ្នាំ២០២៤​ នៅចំណុចភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប ដោយកម្លាំងការិយាល័យព្រហ្មទណ្ឌអាវុធហត្ថខេត្តសៀមរាប​ និងមូលដ្ឋាន​អាវុធ​ហត្ថ​ស្រុកប្រាសាទបាគង សហការជាមួយកម្លាំងព្រហ្មទណ្ឌកងរាជអាវុធហត្ថខេត្តឧត្តរមានជ័យ​ តាមបទបញ្ជាលោកឧត្តមសេនីយ៍ត្រីប៉ោ វណ្ណនិត មេបញ្ជាកាអាវុធហត្ថខេត្តសៀមរាប និងដោយមានការសម្របសម្រួលពី ឯកឧត្តម មាសចន្ទពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប​។

ប្រភពពីសម្ថកិច្ចបានឲ្យដឹងថា ជនសង្ស័យ
១-ឈ្មោះទ្រី សុជា ភេទស្រី​ អាយុ២៨ឆ្នាំ​មុខរបរគ្មានរស់​ នៅភូមិលលៃ​ ស្រុកប្រាសាទបាគង​ ខេត្តសៀមរាប។
២-ឈ្មោះ អ៊ន់ ប៊ុនឡុង ភេទប្រុសអាយុ១៧ឆ្នាំ​ មុខរបរសិស្ស​ រស់នៅភូមិស្ពានក្អែកឃុំកណ្តែក​ ស្រុប្រាសាទបាគងខេត្តសៀមរាប។

ក្នុងប្រតិបត្តិការនេះ ក្រៅពីឃាត់ខ្លួនជនសង្ស័យបានពីរនាក់សមត្ថកិច្ចអាវុធហត្ថ បានដកហូតវត្ថុតាង៖
១-លោហធាតុពណ៌លឿង ខ្សែករ០១ខ្សែ
២-ទូរសព្ទ០២គ្រឿង
៣-លោហធាតុពណ៌លឿងចិញ្ជៀន០២វង់
៤-ម៉ូតូម៉ាក ហុងដាឃ្លីក០១គ្រឿង។

បច្ចុប្បន្នការិយាល័យជំនាញបានបញ្ជូនជនសង្ស័យនិងវត្ថុតាងប្រគល់ជូនការិយាល័យជំនាញអាវុធហត្ថខេត្តឧត្តរមានជ័យដើម្បីបន្តនីតិវិធី។

គួរំលឹកថា ដេប៉ូលក់គ្រឿងសំណង់១កន្លែង យីហោ ថា ស៊ី នាថ ស្ថិតក្នុងភូមិគោករំដួលសង្កាត់សំរោង ក្រុងសំរោង ខេត្តឧត្តរមានជ័យ ត្រូវបានចោរចូលប្លន់សម្លាប់ វេលាម៉ោង៤ទៀបភ្លឺ នៅថ្ងៃទី២៥ ខែឧសភា ឆ្នាំ២០២៤ បានបាត់បង់ទ្រព្យសម្បត្តិដូចរកឃើញខាងលើ ម្ចាស់ដេប៉ូលក់គ្រឿងសំណង់មានឈ្មោះ សួស សត្ថា អាយុ៥៥ឆ្នាំបានបាត់បង់ជីវិត៕
ដោយ រត្ន័ផល្លា