ឃាត់ខ្លួនខ្មាន់កាំភ្លើងជនជាតិចិន៥នាក់ ពាក់ព័ន្ធករណីបាញ់បោះនៅអគាររតនៈសម្បត្តិ

ភ្នំពេញ ៖ កម្លាំងនគរបាលរួមសហការគ្នាស្រាវជ្រាវបង្ក្រាប ខ្មាន់កាំភ្លើងជនជាតិចិន និងបក្ខពួកសរុប៥នាក់ ពាក់ព័ន្ធករណីបាញ់បោះនៅអគាររតនៈសម្បត្តិ ដែលមានទីតាំងស្ថិតនៅអគាររតនៈសម្បត្តិ ទល់មុខអាកាសយានដ្ឋានអន្ដរជាតិភ្នំពេញ ស្ថិតក្នុងសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។

លោកឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ បានឲ្យដឹងថា ជនសង្ស័យជនជាតិចិនទាំង៥នាក់ ដែលកម្លាំងនគរបាលជំនាញរួមសហការគ្នាស្រាវជ្រាវតាមបង្ក្រាបនេះរួមមាន៖

ទី១៖ឈ្មោះ HAN CHONG អាយុ៣៤ឆ្នាំ,ទី២៖ ឈ្មោះ LIU YONGJIE អាយុ៣៤ឆ្នាំ, ទី៣៖ ឈ្មោះ ZHU DACHUN អាយុ៣៨ឆ្នាំ, ទី៤៖ ឈ្មោះ DENG TIAN MING ហៅអឺម៉ អាយុ៣០ឆ្នាំ និងទី៥៖ ឈ្មោះ LI ZIYUAN អាយុ២៩ឆ្នាំ (មិនមានលិខិតឆ្លងដែនតាមខ្លួន)។

ដោយលែកវត្ថុតាងចាប់យក អាវុធវែង ម៉ាក AK47 ចំនួន២ដើម, គ្រាប់កាំភ្លើងប្រភេទ AK មិនទាន់ផ្ទុះ ចំនួន១គ្រាប់, ការ៉ុង ពណ៌ស ចំនួន១, អាវុធខ្លីគ្មានម៉ាក (ក្លែងក្លាយ) ចំនួន១ដើម និងគ្រាប់ចំនួន៣គ្រាប់ (ជ័រ), គ្រាប់អាវុធវែង និងខ្លី សរុបចំនួន៥៩គ្រាប់, រថយន្តម៉ាក FAW BESTUNE ពណ៌ប្រផេះ ពាក់ផ្លាកលេខភ្នំពេញ2AC-7210 ចំនួន១គ្រឿង, រថយន្តម៉ាក TOYOTA LEXUS RX330 ពណ៌ទឹកមាស ពាក់ផ្លាកលេខភ្នំពេញ2AH-2304 ចំនួន១គ្រឿង។

បន្ទាប់ពីបញ្ចប់ការសួរនាំ ជនសង្ស័យទាំង៥នាក់ខាងលើ រួមជាមួយវត្ថុតាង នឹងត្រូវបញ្ជួនទៅកាន់សាលាដំបូងរាជធានីភ្នំពេញ នៅព្រឹកថ្ងៃទី១៨ ខែកុម្ភៈ ឆ្នាំ២០២៥នេះ ដើម្បីចាត់ការបន្ដតាមផ្លូវច្បាប់ជាធរមាន៕