ខេត្តព្រះសីហនុ៖ ថ្មីៗនេះ​រដ្ឋបាល​ខេត្ត​ព្រះសីហនុ​បាន​ដឹកនាំ​ក្រុមការងារ​រដ្ឋបាលខេត្ត​ចុះ​ត្រួតពិនិត្យ​ទីតាំងសាងសង់អាងតន្ត្រីបាញ់ទឹក និងរបាំងការពាររលកសមុទ្រ របស់​ក្រុមហ៊ុន​ យូណាន ជីងចេង ខូអិលធីឌី នៅ​ចំណុច​បណ្ដោយ​ឆ្នេរ​អូរត្រេះ​ ភូមិ៦ សង្កាត់លេខ៤ ក្រុងព្រះសីហនុ។ ជា​លទ្ធផល​បាន​ធ្វើការឃាត់ និង​តម្រូវ​ឲ្យ​ក្រុមហ៊ុន​ខាងលើ​កាយដី​ដែល​ចាក់​នោះចេញ​វិញ​ កាលពី​ថ្ងៃទី១០ ខែមិថុនា ឆ្នាំ២០២៤។

បើតាម​លោក​ ឃាង ភារម្យ អ្នកនាំពាក្យសាលាព្រះសីហនុ បានឲ្យដឹងតាម​ប្រព័ន្ធតេឡេក្រាមថា រដ្ឋបាលខេត្តបានឱ្យក្រុមហ៊ុនផ្អាកការដ្ឋានជាបណ្តោះអាសន្នសិន ដោយបានណែនាំក្រុមហ៊ុនបំពេញលក្ខខណ្ឌមួយចំនួន៖

ទី១-ក្រុមហ៊ុនត្រូវសហការជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ក្នុងការកំណត់និយាមកាទីតាំងសាងសង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ រួចដាក់ជូនរដ្ឋបាលខេត្ត ដើម្បីប្រជុំពិនិត្យ មុននឹងដាក់ស្នើសុំគោលការណ៍ប្រើប្រាស់ដីឆ្នេរសាធារណៈពីរាជរដ្ឋាភិបាល។

ទី២- ក្រុមហ៊ុនត្រូវសិក្សាគម្រោងប្លង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ ត្រឹមត្រូវតាមលក្ខណៈបច្ចេកទេស និងអត្តសញ្ញាណល្អឯកសម្រាប់ខេត្តព្រះសីហនុ ដើម្បីទាក់ទាញអ្នកទេសចរណ៍ និងអ្នកវិនិយោគ។

ទី៣- ក្រុមហ៊ុនត្រូវសិក្សាពីផលប៉ះពាល់បរិស្ថានឱ្យបានហ្មត់ចត់។

ទី៤- ក្រុមហ៊ុនត្រូវស្នើសុំលិខិតអនុញ្ញាតសាងសង់ និងលិខិតអនុញ្ញាតបើកការដ្ឋាន ពីក្រសួងរៀបចំដែនដី នគរូបនីយកម្ម និងសំណង់។

ទី៥- ក្រុមហ៊ុនត្រូវសហការជាមួយអាជ្ញាធរ និងមន្ទីរជំនាញពាក់ព័ន្ធ ក្នុងការអនុវត្តគម្រោងឱ្យស្របតាមនីតិវិធី និងលិខិតបទដ្ឋានគតិយុត្តិដែលមានចែងជាធរមាន។

ពាក់ព័ន្ធ​និង​បញ្ហា​នេះ​ លោក​ អុី​ សុខឡេង​ អភិបាលរង​ខេត្ត​ ក៏បាន​បញ្ជាក់​យ៉ាងខ្លីផង​ដែរ​ ថា​ ការដ្ឋាន​នេះ​ត្រូវ​បាន​ឲ្យ​ផ្អាក​ និង​ឲ្យចេញវិញ​។

បើតាម​ប្រសាសន៍​របស់​ សម្ដេច​តេជោ​រ​ ប្រធាន​សភា​ ធ្លាប់​មាន​ប្រសាសន៍​ថា​ មិនឲ្យ​មាន​អ្នក​ទៅ​រំលោភ​យក​ដីភ្នំ​ ឬដី​ឆ្នេរ​សមុទ្រ​ដែល​ជា​កម្មសិទ្ធិ​របស់រដ្ឋ​នោះឡើយ បើមាន​ទោះ​ចេញ​ប័ណ្ណ​កម្មសិទ្ធិ​រួចក៏​ដោយ​ ក៏ត្រូវតែ​មោកភាព​ចោលដែរ​។

សូម​បញ្ជាក់​ថា​៖ ការ​ចាក់ដី​(ចាក់ថ្ម​) លុបចូល​សមុទ្រ​នេះ ក្រុមហ៊ុន​ខាង​លើក៏​មាន​លិខិត អនុញ្ញាត​លេខ១០៤២ ដនស/ខុទ្ទ ចុះថ្ងៃទី៨​ ខែឧសភា ឆ្នាំ២០២៤ របស់ក្រសួងរៀបចំដែនដី នគរូបនីយកម្ម និងសំណង់ផងដែរទើបក្រុមហ៊ុនខាងលើហ៊ានធ្វើដូច្នេះ៕