ថ្មីៗនេះចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសអតីតឧកញ៉ា ហេង សិទ្ធី ភេទប្រុស អាយុ៣៦ ឆ្នំា មានចំនួន៤សំណុំកាលពីថ្ងៃទី២២ ខែមករា ឆ្នាំ២០២៦ ។

សំណុំរឿងទី១ បទហឹង្សាដោយចេតនា ដាក់ពន្ធនាគារកំណត់២ ឆ្នាំ, សំណុំរឿងទី២ បទបរិហារកេរ្តិ៍ និងបទញុះញង់ឱ្យមានការរើសអើង ដាក់ពន្ធនាគារកំណត់១ឆ្នាំ៦ខែ, សំណុំរឿង៣ បទញុះញង់បង្កឲ្យមានភាពវឹកវរធ្ងន់ធ្ងរដល់សណ្ដាប់ធ្នាប់សង្គម ដាក់ពន្ធនាគារកំណត់២ ឆ្នាំ និង សំណុំរឿងទី៤ បទកំរាមកំហែងហែកកេរ្តិ៍មានស្ថានទម្ងន់ទោស ដាក់ពន្ធនាគារកំណត់៨ ឆ្នាំ ។ ដូច្នោះទោសសរុបទាំង៤ សំណុំរឿង ជនជាប់ចោទត្រូវអនុវត្តក្នុងពន្ធនាគារចំនួន១៣ ឆ្នាំ ៦ខែ ដែលបច្ចុប្បន្នជនជាប់ចោទអតីតឧកញ៉ា ហេង សិទ្ធី កំពុងជាប់ឃុំនៅពន្ធនាគារ(ម៣)ត្រពាំងផ្លុង ខេត្តត្បូងឃ្មុំ។

កាលពីព្រឹកថ្ងៃទី២០ ខែវិច្ឆិកា ឆ្នាំ២០២៥ សាលាដំបូងរាជធានីភ្នំពេញ បានលើកយកសំណុំរឿង អតីតឧកញ៉ា #ហេងសិទ្ធី មកបើកសវនាការជំនុំជម្រះទោសជាសាធារណៈ ពាក់ពន្ធបទល្មើសចំនួន២ ៖ ១.សំណុំរឿងព្រហ្មទណ្ឌបទហិង្សាដោយចេតនា និង ២.សំណុំរឿងព្រហ្មទណ្ឌពីបទ.គំរាមកំហែងហែកកេរ្តិ៍។

សូមជម្រាបថា ៖ សាលាដំបូងរាជធានីភ្នំពេញ កាលពីថ្ងៃទី២៥ ខែធ្នូ ឆ្នាំ២០២៥ បានសម្រេចលើកពេលប្រកាសសាលក្រម អតីតឧកញ៉ា ហេង សិទ្ធី ពាក់ពន្ធសំណុំរឿងការចោទប្រកាន់ពីបទហឹង្សាដោយចេតនា និងគំរាមកំហែងហែកកេរ្តិ៍ និង២សំណុំរឿងទៀតទៅថ្ងៃក្រោយ។

គួរំលឹកផងដែរថា លោក ហេង សិទ្ធី ត្រូវបានតុលាការសាលាដំបូងរាជធានីភ្នំពេញ ចេញដីកាបង្គាប់ឱ្យចាប់ខ្លួន កាលពីថ្ងៃទី៣ ខែធ្នូ ឆ្នាំ២០២៤ កន្លងទៅនេះ ពីបទគំរាមកំហែងហែកកេរ្តិ៍មានស្ថានទម្ងន់ទោស ដែលបានប្រព្រឹត្តិទៅនៅប្រទេសកម្ពុជាក្នុងអំឡុងខែ វិច្ឆិកា ឆ្នាំ២០២៤។ អតីតឧកញ៉ា ហេង សិទ្ធី ត្រូវបានសមត្តកិច្ចនគរបាលជាតិនៃប្រទេសកម្ពុជា សហការជាមួយអាជ្ញាធរនៃប្រទេសរុស្សី បាននាំខ្លួនពីប្រទេសរុស្សីតាមដីការបស់ចៅក្រមស៊ើបសួរសាលាដំបូងរាជធានីភ្នំពេញ ដោយនាំយកទៅឃុំខ្លួនជាបណ្តោះអាសន្ននៅពន្ធនាគារម១ព្រៃស ដើម្បីបើកការស៊ើបអង្កេតលើការចោទប្រកាន់នោះ៕

ប្រភព MKn