ស្នងការរដ្ឋាន នគរបាលខេត្តរតនគិរី ត្រៀមកម្លាំងជាស្រេចក្នុងការការពារសន្តិសុខសណ្ដាប់ធ្នាប់ជូនប្រជាពលរដ្ឋក្នុងឱកាសបុណ្យចូលឆ្នាំថ្មីខាងមុខនេះ

ខេត្តរតនគិរី ៖ ដើម្បីការពារសន្តិសុខសណ្ដាប់ធ្នាប់ជូនប្រជាពលរដ្ឋក្នុងការកម្សាន្តសប្បាយនាឱកាសបុណ្យចូលឆ្នាំថ្មីខាងមុខ។ នៅថ្ងៃទី០៧ ខែមេសា ឆ្នាំ២០២៥ លោកឧត្តមសេនីយ៍ទោ អ៊ុង សុភាព ស្នងការនគរបាលខេត្ត បានដឹកនាំប្រមូលផ្តុំកងកម្លាំងនៃស្នងការដ្ឋាននគរបាលខេត្តរតនគិរី ដើម្បីត្រៀមខ្លួនរួចជាស្រេច និងដាក់ចេញនូវវិធានការប្រើប្រាស់កម្លាំងសរុប ព្រមទាំងមធ្យោបាយសរុប សម្រាប់ការងារ ការពារ រក្សាសន្តិសុខ សណ្តាប់ធ្នាប់ សុវត្ថិភាពសង្គម ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងកម្មវិធីទទួលសង្រ្កាន្តនាំថ្មីទូទាំងខេត្តរតនគិរី ដែលកាន់តែខិតជិតចូលមកដល់នាពេលខាងមុខនេះ ។

យោងតាមការឲ្យដឹងពី លោកឧត្តមសេនីយ៍ទោ អ៊ុង សុភាព ស្នងការនគរបាលខេត្តរតនគិរី បានថ្លែងថា  លោកបានត្រៀមកងកម្លាំងជាស្រេច ចាប់ពីថ្ងៃនេះតទៅ ដើម្បីប្រើប្រាស់កម្លាំងនគរបាលសរុប កម្លាំងអន្តរាគមន៍ពិសេស, ឡានសារ៉ែន, រថយន្តពន្លត់អគ្គិភ័យ, រថយន្តសង្គ្រោះ ម៉ូតូប្រដេញ, ម៉ូតូបើកល្បាតចល័ត, វិទ្យុទាក់ទង ដើម្បីការពារ សន្តិសុខ សុវត្ថិភាពសណ្តាប់ធ្នាប់សាធារណៈ ជូនសង្គមជាតិ និងប្រជាពលរដ្ឋ តាមទីប្រជុំជន វត្តអារាម ទីកម្សាន្តសប្បាយនានា ជាពិសេសទប់ស្កាត់ក្មេងទំនើង ដែលជាមុខសញ្ញាបង្ករបញ្ហានៅតាមគោលដៅកម្សាននីមួយៗ។ ទន្ទឹមនឹងការត្រៀមកម្លាំងដ៏ម៉ត់ចត់នេះផងដែរ លោកឧត្តមសេនីយ៍ទោស្នងការ ក៏បានបានប្រសិទ្ធពរជ័យ ជូនចំពោះកងកម្លាំងនគរបាលនៃស្នងការដ្ឋាននគរបាលខេត្តរតនគិរីទាំងអស់ ក្នុងឱកាសបុណ្យចូលឆ្នាំថ្មី សូមអោយទទួលបាន ជោគជ័យគ្រប់ភារកិច្ច ទទួលបានសេចក្តីសុខសប្បាយ ត្រជាក់ជុំ ចំរ៉ុងចំរើន សុភមង្គល ក្នុងការងារនិងក្រុមគ្រួសារ ធ្វើដំណើរទីជិតឬ ទីឆ្ងាយ ជួបប្រទះសុខសុវត្ថិភាពល្អ គ្រប់ពេលវេលា។

គួរបញ្ជាក់ផងដែរថា បើទោះជាមានការស្មុគស្មាញលំបាកយ៉ាងណាក៏ដោយ កិច្ចការការពារសន្តិសុខ រក្សាសណ្ដាប់ធ្នាប់ក្នុងខេត្តរតនគិរី ក្រោមការបញ្ជាផ្ទាល់ពីលោកឧត្តមសេនីយ៍ទោ អ៊ុង សុភាព ស្នងការនគរបាល បានធ្វើឲ្យប្រជាពលរដ្ឋក្នុងខេត្តរតនគិរី ព្រមទាំងភ្ញៀវទេសចរដែលបានមកកម្សាន្តនៅរមណីយដ្ឋាននានា ក្នុងខេត្តរតនគីរី មានការសប្បាយរីករាយ ដោយមិនមានការបារម្ម ហើយជឿជាក់មានទំនុកចិត្តយ៉ាងកក់ក្ដៅក្រៃលែង៕ ដោយ ភួង ផុន