គណៈកម្មការទី៣នៃរដ្ឋសភា ចុះសិក្សាស្វែងយល់ពីវិផែនការស័យវិនិយោគ និងធនធានទឹកនៅខេត្តរតនគិរី

ខេត្តរតនគិរី៖ ប្រតិភូគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា ដឹកនាំដោយ ឯកឧត្តម ជា វ៉ាន់ដេត ប្រធានគណៈកម្មការ នៅថ្ងៃទី៧ ខែសីហាឆ្នាំ២០១៩ នេះ បានអញ្ជើញចុះបំពេញបេសកកម្មនៅខេត្តរតនគិរី ដើម្បីស្វែងយល់អំពីប្រសិទ្ធភាព នៃការអនុវត្តន៍ច្បាប់នានា ពាក់ព័ន្ធនឹងវិស័យដែលគណៈកម្មការទទួលខុសត្រូវ ក៏ដូចជាពិនិត្យមើលពីភាពរីកចម្រើន និងជីវភាពរស់នៅរបស់ប្រជាពលរដ្ឋក្នុងខេត្ត ពិសេសលើការងារធ្វើផែនការវិនិយោគ និងធនធានទឹក។

ថ្នាក់ដឹកនាំខេត្តរតនគិរី ក៏បានទទួលជួបគណៈប្រតិភូគណៈកម្មាធិការទី៣ នៃរដ្ឋសភា។ ឯកឧត្តម ថង សាវុន អភិបាលខេត្ត បានសម្តែងនូវកិច្ចស្វាគមន៍យ៉ាងកក់ក្តៅចំពោះវត្តមានរបស់ប្រតិភូគណៈកម្មាធិការទី៣ នៃរដ្ឋសភា។ ឯកឧត្តមចាត់ទុកថា នេះជាការលើកទឹកចិត្ត ចំពោះកិច្ចខិតខំប្រឹងប្រែងរបស់រដ្ឋបាលថ្នាក់ក្រោមជាតិ ដែលបានខិតខំបំពេញការងារកន្លងមក។ ព្រមជាមួយគ្នានេះដែរ ឯកឧត្តមអភិបាលខេត្ត បានរាយការណ៍អំពីវឌ្ឍនៈភាពការងារ និងបញ្ហាប្រឈមមួយចំនួនជូនប្រតិភូផងដែរ។

ឯកឧត្តមប្រធានប្រតិភូ គណៈកម្មាធិការទី៣ បានសម្តែងនូវការកោតសរសើរ និងវាយតម្លៃខ្ពស់ចំពោះវឌ្ឍនៈភាពការងារដែលរដ្ឋបាលខេត្តសម្រេចបានកន្លងមកនេះ។ ទន្ទឹមគ្នានេះ ប្រតិភូគណៈកម្មាធិការ នាំយកនូវបញ្ហាប្រឈមមួយចំនួនពាក់ព័ន្ធ និងសមត្ថកិច្ចរបស់គណៈកម្មាធិការ ដើម្បីរាយការណ៍ជូនថ្នាក់ដឹកនាំ និងស្វែងរកដំណោះស្រាយ សំដៅលើកកម្ពស់ប្រសិទ្ធភាពការងារ និងការឆ្លើយតបបានទាន់ពេលវេលាទៅនិងតម្រូវការរបស់ប្រជាពលរដ្ឋមូលដ្ឋាន៕ ដោយ ភួង ផុន