សមត្ថកិច្ចចម្រុះខេត្តចុះត្រួតពិនិត្យដេប៉ូចែកចាយឈើក្នុងក្រុងបានលុង

ខេត្តរតនគិរី៖ ដោយយោងតាមបទបញ្ជារបស់ប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ សមត្ថកិច្ចចម្រុះខេត្តរតនគិរី បានចុះត្រួតពិនិត្យដេប៉ូឈើ ៣កន្លែង ក្នុងក្រុងបានលុង។

នៅព្រឹកថ្ងៃទី២២ ខែកក្តដា ឆ្នាំ២០១៩ ក្រុមការងារចម្រុះ ខេត្តរតនគិរី បានចុះត្រួតពិនិត្យដេប៉ូចែកចាយឈើ ៣កន្លែងក្នុងក្រុបានលុង ដឹកនាំ សម្របសម្រួល ដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្ត។
ដេប៉ូឈើដែលក្រុមចម្រុះខេត្តចុះត្រួតពិនិត្យនោះ ១.ម្ចាស់ដេប៉ូមានឈ្មោះ ឌុច ស្រីពៅ ភេទស្រី ដែលមានទីតាំងស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង មានលិខិតអនុញ្ញាតិលេខ.04/18/ខរព/រគ/FPS/P
២.ម្ចាស់ដេប៉ូឈ្មោះ ភេន ណាវី ភេទស្រី មានទីតាំងស្ថិតនៅភូមិអូរកន្សែង សង្កាត់បឹងកន្សែង ក្រុងបានលុង មានលិខិិតអនុញ្ញតិលេខ06/18/ខរព/រគ/FPS/P
៣.ម្ចាស់ដេប៉ូឈ្មោះ យិន ថាវី ភេទស្រី មានទីតាំងស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុង មានលិខិតអនុញ្ញាតិលេខ05/18/ខរព/រគ/FPS/P ។

យោងតាមការចុះត្រួតពិនិត្យជាក់ស្ដែងនេះ ក្រុមការងារចម្រុះពិនិត្យឃើញថា ដេប៉ូទាំង ៣កន្លែង មានលិខិតអនុញ្ញាតិត្រឹមត្រូវនិងប្រតិបត្តិទៅតាមលិខិតអនុញ្ញាតិ(PC)។

ក្រោយពេលពិនិត្យឃើញថា ដេប៉ូចែកចាយឈើ ក្នុងខេត្តនីមួយៗ អនុវត្តបានត្រឹមត្រូវ តាមលិខិតអនុញ្ញាតិរួចមក លោក រ៉ា បូរ៉ាន់ឌី បានធ្វើការណែនាំម្ចាស់ដេប៉ូនីមួយថា នៅពេលនេះ ការត្រួតពិនិត្យ ផ្ទៀងផ្ទាត់ ឃើញថា ម្ចាស់ដេប៉ូ បានអនុវត្តត្រឹមត្រូវ តាមលិខិតអនុញ្ញាតិ ក៏ប៉ុន្តែលោកក៏បានណែនាំដល់ម្ចាស់ដេប៉ូថា ខាងមុខ បើសិនជា ការលក់ចែកចាយឈើគ្រប់ចំនួនតាមលិខិតអនុញ្ញាតិហើយ សូមមេត្តា ប្រញាប់ប្រញាល បន្តសុំលិខិតតាមរយៈជំនាញរដ្ឋបាលព្រៃឈើបន្តទៀត ជៀសវាងបន្តលក់ឈើ មិនមានលិខិតអនុញ្ញតិ មិនដូច្នេះទេ សមត្ថកិច្ចនឹងអនុវត្តតាមច្បាប់ហើយ មិនមានការលើកលែងនោះទេ៕ ដោយ ភួង ផុន