សិស្សចំនួន១៥១នាក់ទទួលអំណោយពីសប្បុរសជន

ខេត្តរតនគិរី៖ បន្ទាប់ពីរាជរដ្ឋាភិបាលបង្កើនការយកចិត្តទុកដាក់ដល់ប្រជាជន ដែលមានជីវភាពក្រីក្រ ប្រជាជនរង្គ្រោះ និងងាយរង្គ្រោះកន្លងមក បានប្រែក្លាយជាគំរូមួយ ដែលធ្វើឲ្យប្រជាពលរដ្ឋទូទៅ ចេះស្រលាញ់គ្នា ចេះជួយជនរួមជាតិដូចគ្នា ចេះចែករំលែកគ្នា នៅពេលដែលមានប្រជាពលរដ្ឋដូចគ្នាណាម្នាក់ ជួបការលំបាក ជួបការខ្វះខាត និងកំពង់ទទួលរងនូវគ្រោះមហន្តរាយណាមួយ។

ជាក់ស្ដែង នៅរសៀលថ្ងៃទី១៣ ខែកក្កដា ឆ្នាំ២០១៩ កន្លងទៅនេះ លោក គឹម រស្មី និងភរិយា ដែលជាប្រជាកសិករមួយរូប បានមូលមតិគ្មាជាមួយប្រជាកសិករ មួយចំនួន ដែលមានជីវភាពធូរធារ នាំគ្នាយកអំណោយជា ប៊ិច សៀវភៅ កាបូបស្ពាយ និងថវិការមួយចំនួនទៅចែកជូនដល់ក្មួយៗ សិស្សានុសិស្សចំនួន ១៥១នាក់ រៀនថ្នាក់ទី១ រហូតដល់ថ្នាក់ទី៦ រៀននៅសាលាបឋមសិក្សា កបថ្មី ស្ថិតក្នុងភូមិកប ឃុំទីងចាក់ ស្រុកបរកែវ ខេត្តរតនគិរី បន្ទាប់ពីទទួលបានដំណឹងថា ក្មួយៗ រៀននៅសាលានោះ មានការខ្វះខាត។ អំណោយដែលចែកជូននៅពេលនោះ ក្មួយៗ រៀនថ្នាក់ទី១ រហូតដល់ថ្នាក់ទី៣ ម្នាក់ៗទទួលបាន កាបូបស្ពាយ១ សៀវភៅ៣ក្បាល ព្រមទាំងប៊ិច និងខ្មៅដៃទៀតផង។ ចំណែកសិស្សរៀនចាប់ពីថ្នាក់ទី៤ ឡើងទៅម្នាក់ៗ ទទួលបាន២ម៉ឺនរៀល។

បន្ទាប់ពីចែកអំណោយរួចមក លោកនាយកសាលា បានស្នើសុំបន្ថែមថវិការចំនួន ៤លានរៀល ដើម្បីសាងសង់ត បន្ទប់មួយល្វែងទៀត ប្រវែង៦ម៉ែត្រ ស្មើនិងមួយថ្នាក់។ លោក គឹម រស្មី ព្រមទាំងភរិយា និងសប្បុរសជនទាំងអស់ ក៏បានឯកភាពគ្នា ជួយបន្ថែមចំនួនទឹកប្រាក់ ៤លានរៀលទៀតផងដែរ។

លោកមេឃុំ ប្រធានភូមិ និងនាយកសាលាបឋមសិក្សាកបថ្មី ក៏បានថ្លែងអំណរគុណយ៉ាងជ្រាលជ្រៅ ដល់លោក គឹម ស្មី ព្រមទាំងភរិយា និងសប្បុរសជនទាំងអស់ ដែលបានចំណាយពេលវេលា កម្លាំងកាយចិត្ត និងថិការ មកជួយដល់កូនចៅពួកគាត់ ក៏ដូចជាជួយដល់សង្គមខ្មែរទាំងមូលផងដែរ៕ ដោយ ភួង ផុន