ពលរដ្ឋស្នើរដល់អភិបាលស្រុកអូររាំង និងមន្រ្តីជំនាញពាក់ព័ន្ធមានចំណាត់ការទៅលើការប្តឹងតវ៉ារបស់ប្រជាពលរដ្ឋនៅក្រុមរការថ្មី

ខេត្តមណ្ឌលគិរី៖ ក្រោយពីប្រជាពលរដ្ឋបានចោទប្រកាន់ទៅលើមន្រ្តីយោធាម្នាក់ពាក់ស័ក្កិ៣ខាងអន្តរគមន៍ប្រតិបត្តិការសឹករងមណ្ឌលគិរី ថាកាងដីព្រៃជម្រកសត្វព្រៃអូររាំង លក់ទៅអោយជនជាតិចិនរាប់រយហិកតា ស្ថិតក្នុងភូមិសាស្រ្តស្រុកអូររាំង នាពេលថ្មីៗនេះពាក្យប្តឹងតវ៉ារបស់ប្រជាពលរដ្ឋរួមទាំងស្នាមមេដៃប្រជាពលរដ្ឋរស់នៅក្នុងក្រុមរការថ្មីចំនួន១០១នាក់ បានចូលទៅដល់សាលាឃុំសែនមនោរម្យរួចហើយបើគិតមកដល់ថ្ងៃទី៥ខែកក្កដាឆ្នាំ២០១៩ ពាក្យប្តឹងតវ៉ាបានដាក់នៅសាលាឃុំចំនួន៥ទៅ៦ថ្ងៃហើយ។

ប្រជាពលរដ្ឋខាងលើបានរងចាំមើលចំណាត់ការរបស់អភិបាលស្រុកអូររាំង លោក សៀកមុន្នី ដែលទើបឡើងកាន់តំណែងជាអភិបាលស្រុក កាលពីព្រឹកថ្ងៃទី៤ខែកក្កដាឆ្នាំ២០១៩នាពេលថ្មីៗនេះ ជំនួសលោក នួង ទុណ្ណារី ដែលត្រូវចូលនិវត្តន៍ មានចំណាត់ការយ៉ាងណាទៅបុគ្គលដែលរំលោភយកដីព្រៃជម្រកសត្វព្រៃអូររាំងលក់រាប់រយហិកតា។

នៅក្នុងពិធីប្រកាសតែងតាំងអភិបាលស្រុកអូររាំងនោះដែរ ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានព្រមានដល់មន្រ្តី និងសមត្ថកិច្ចណាដែលពាក់ព័ន្ធឃុបឃិតគ្នាយកដីសហគមន៍ទៅលក់អោយឈ្មួញ ត្រូវដកខ្លួនជាបន្ទាន់ បើមិនចង់ប្រឈមចំពោះមុខច្បាប់ ជាពិសេសដីដែលបានចុះបញ្ជីទទួលស្គាល់ពីក្រសួងមហាផ្ទៃ សម្រាប់ការអភិវឌ្ឍន៍ និងអភិរក្សព្រៃ សត្វព្រៃ ជីវៈចំរុះ។

ប្រជាពលរដ្ឋសង្ឃឹងយ៉ាងម៉ុតមាំថា លោកអភិបាលស្រុកអូររាំងនឹងធ្វើការដោះស្រាយនូវពាក្យប្តឹងតវ៉ារបស់ប្រជាពលរដ្ឋ ដើម្បីយកដីព្រៃនេះមកទុកជាជម្រកសត្វព្រៃវិញ ពីព្រោះនៅតំបន់នោះមានសត្វដំរីព្រៃរស់នៅ ប្រជាពលរដ្ឋធ្វើដំណើរឆ្លងកាត់ម្តងៗតែងតែជួបប្រទះសត្វដំរីព្រៃ និងសត្វព្រៃផ្សេងៗផងដែរ។

បើទុកអោយជនខិលខូចឆ្លៀតឱកាសយកដីព្រៃជម្រកសត្វព្រៃអូររាំងទៅលក់ សត្វព្រៃនៅក្នុងតំបន់នោះគ្មានទីជម្រកឡើយ។ ក្រោយពីគេហទំព័រយើង និងមានព័ត៌មានក្នុងស្រុកមួយចំនួនបានធ្វើការផ្សាយរឿងដែលមន្រ្តីយោធាម្នាក់ពាក់ស័ក្កិ៣ខាងអន្តរាគមន៍ប្រតិបត្តិការសឹករងមណ្ឌលគិរី ឈ្មោះ ស្រេម ផ្លូន ដែលបានរងការចោទប្រកាន់ពីប្រជាពលរដ្ឋនៅក្នុងក្រុមរការថ្មីថា បានកាងដីព្រៃជម្រកសត្វព្រៃអូររាំងលក់ មហាជនថាតើអាជ្ញាធរស្រុកអូររាំងមានវិធានការយ៉ាងណាទៅមន្រ្តីយោធាម្នាក់នោះ បើសិនមន្រ្តីយោធារូបនោះបានរំលោភយកដីព្រៃជម្រកសត្វព្រៃអូររាំង ដូចប្រជាពលរដ្ឋនៅក្នុងក្រុមរការថ្មី ប្តឹងតវ៉ា។

ជុំវិញទៅនឹងរឿងរ៉ាវខាងលើ មិនអាចសុំការអត្ថាធិប្បាយពីលោក សៀក មុន្នី អភិបាលស្រុកអូររាំងបានឡើយដោយសារពុំមានលេខទូរស័ព្ទទំនាក់ទំនង គេហទំព័រយើងនឹងស្រាវជ្រាវរកលេខទូរស័ព្ទលោកអភិបាលស្រុកអូររាំង សុំការអត្ថាធិប្បាយធ្វើការផ្សព្វផ្សាយនៅលេខក្រោយបន្តទៀត៕ដោយ៖រមនា