សាលាបឋមសិក្សាហ៊ុនសែនក្រុង ត្រូវលោកគ្រូអ្នកគ្រូប្រមាណជា ៤២នាក់បានចូលទន្ទ្រានកាន់កាប់ដីសាលាយ៉ាងអាណាធិបតេយ្យ

ខេត្តព្រះសីហនុ៖ នាពេលបច្ចុប្បន្ននេះដីក្រុង/ខេត្តព្រះសីហនុ កំពុងតែមានហាងឆេងធ្វើឲ្យមានការរំលោភចូលទន្ទ្រានកាន់កាប់ដីក្នុងសាលាបឋមសិក្សាហ៊ុនសែនក្រុងយ៉ាងអាណាធិបតេយ្យ និងមានការឃុបឃិតគ្នារំលោភយកដីសាលារៀនអង្កន់ជាឡូតិ៍ដើម្បីចែកគ្នាធ្វើជាកម្មសិទ្ធិផ្ទាល់ខ្លួន។

ប្រភពដដែលបានបញ្ជាក់ផងដែរថាប្រហែលជាមានការឃុបឃិតរវាង ប្រធានមន្ទីរអប់រំយុវជននិងកីឡា នាយកសាលារួមជាមួយលោកគ្រូអ្នកគ្រូទើបធ្វើឲ្យមានការបែងចែកដីឡូត៍របស់សាលារៀនដែលជាដីរបស់រដ្ឋ និងមានការសង់ផ្ទះបែងចែកជាឡូតិ៍យ៉ាងអនាធិបតេយ្យដូចនេះ។

ជុំវិញករណីខាងលើនេះ លោកគ្រូអ្នកគ្រូដែលបានចាប់ដីសាលាបឋមសិក្សាហ៊ុនសែនក្រុង លោកនាយកសាលាបានប្រាប់ឲ្យដឹងថាគឺ លោកពុំមានការឃុបឃិតនោះឡើយ ហើយលោកក៏បានណែនាំដល់លោកគ្រូអ្នកគ្រូទាំងអស់នោះបញ្ឈប់សកម្មភាពព្រោះថាដីនេះជាដីរបស់រដ្ឋមិនអាចអោយទៅបុគ្គលណាបានឡើយ ហើយលោកក៏បានធ្វើរបាយការណ៍ជូនទៅមន្ទីរអប់រំយុវជននិងកីឡាក៏ដូចជាអាជ្ញាធរក្រុងខេត្តដើម្បីជូនជ្រាបផងដែរ។

លោក កែវ ឡាយ ប្រធានមន្ទីរអប់រំយុវជននិងកីឡាខេត្តព្រះសីហនុក៏បានលើកឡើងផងដែរថា ជុំវិញករណីនេះលោកគ្រូអ្នកគ្រូចំនួន ៤២នាក់បានស្នើសុំមកមន្ទីរ ដើម្បីសុំដីរបស់សាលាបឋមសិក្សាហ៊ុនសែនក្រុងខាងលើនេះ
គឺលោកមិនអនុញ្ញាតនោះទេ ព្រោះដីនេះជាដីរបស់សាលានិងជាដីរបស់រដ្ឋហើយលោកក៏បានបដិសេធ ។

រាល់បញ្ហាការលើកឡើងថាមានការឃុបឃិត ពីមន្ទីរអប់រំជាមួយនឹងលោកគ្រូអ្នកគ្រូក្នុងការចែកដីរបស់រដ្ឋនោះដែរ ហើយជុំវិញបញ្ហានេះឯកឧត្តម យន្ត មីន អភិបាលខេត្តព្រះសីហនុបានចុះមកពិនិត្យទីតាំងជាក់ស្ដែង និងពន្យល់ណែនាំទៅដល់លោកគ្រូអ្នកគ្រូដែលមានបំណងស្នើសុំចង់បានដីរបស់សាលានោះក៏ឯកឧត្តម មិនអនុញ្ញាតដែរព្រោះដីនេះជាដីជាប់របស់រដ្ឋ គ្រប់គ្រងដោយមន្ទីរអប់រំយុវជននិងកីឡា។

ទោះបីមានការបដិសេធក្នុងការស្នើសុំរបស់លោកគ្រូអ្នកគ្រូទាំង ៤២នាក់ពីនាយកសាលានិងប្រធានមន្ទីរអប់រំយុវជនរហូតដល់អាជ្ញាធរខេត្តយ៉ាងណាក៏ដោយ​ នៅទីតាំងដីឃើញថាកំពុងតែបន្តមានការរំលោភដីរបស់សាលាធ្វើកម្មសិទ្ធិផ្ទាល់ខ្លួន និងធ្វើសកម្មភាពដូចជាការសាងសង់ផ្ទះ និងបែងចែកជាឡូតិ៍ៗ ដោយមិនមានការខ្លាចញញើតជាមួយនឹងសមត្ថកិច្ចក៏ដូចជាអាជ្ញាធរនោះឡើយ។ សរុបសេចក្ដីមកទង្វើរបស់អ្នកគ្រូលោកគ្រូ៤២នាក់ដែលកំពុងប្រព្រឹត្តនៅពេលនេះ និយាយពីច្បាប់ភូមិបាលត្រង់មាត្រា២៥៩ លោកគ្រូអ្នកគ្រូអាចប្រឈមមុខនឹងទោសទណ្ឌពីកម្រិត ១ឆ្នាំទៅដល់ ៥ឆ្នាំនិងពិន័យជាប្រាក់ពី ៥លានរៀលទៅ ៥០លានរៀលជាកំណត់។

ដូចនេះជុំវិញបញ្ហាការរំលោភបំពានដីរបស់សាលានេះបើអាជ្ញាធរនៅតែបណ្ដែតបណ្ដោយមិនមានការដោះស្រាយនោះទេធ្វើឲ្យមតិមហាជនក៏ដូចជាលោកគ្រូអ្នកគ្រូដែលនៅសាលាផ្សេងៗទៀតក៏អាចនឹងមានការកើតឡើងក្នុងការរំលោភបំពានដីរបស់សាលាដូចសាលាបឋមសិក្សាហ៊ុនសែនក្រុងនេះដែរព្រោះថាដី របស់សាលាគឺមានទីធ្លាធំទូលាយស្ទើរតែគ្រប់ទីកន្លែងដូចនេះបើអាជ្ញាធរ និងសមត្ថកិច្ចមិនមានវិធានការទប់ស្កាត់នោះទេនឹងជួបបញ្ហានៅសាលាផ្សេងៗទៀតជាក់ជាមិនខាន៕