លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុមានប្រសាសន៍ថា សម្រាប់កុងត្រាជាមួយក្រុមហ៊ុនសាងសង់ផ្លូវមានរយៈពេល៦ខែ រហូតមកដល់ពេលនេះគឺផុតហើយ លោកបន្តថា ការ៉ូឡា ថ្មក្រានិត សម្រាប់តែធ្វើដំណើរដោយថ្មើរជើង ធ្វើដំណើរដោយកង់ និងរទេះជនពិការ មិនសម្រាប់យានយន្តបើកបរឬឈប់ចតនោះទេ បើរកឃើញមានករណីធ្វើឲ្យបែកបាក់ រដ្ឋបាលខេត្តនិងចាប់ឲ្យសងការខូចខាតនោះហើយ ពាក់ព័ន្ធតម្លៃនិងមានតាមប្រភេទទៅតាមនោះ។ លោកបន្ថែមថា ពាក់ព័ន្ធនិងការគាស់កកាយរដ្ឋបាលខេត្តនិងឲ្យសងទៅតាមនោះ។ លោកបញ្ជាក់ថា បើចង់ឲ្យបានទីក្រុងស្អាតយើងត្រូវចូលរួមថែរក្សាទាំងអស់គ្នា សហការក្នុងការរាយការណ៍ បើឃើញមានរថយន្តបើកបរឬឈប់ចតលើការ៉ូឡា ថ្មក្រានិតយើងត្រូវថតស្លាកលេខនិងរាយការណ៍ឲ្យបានលឿន ដើម្បីរដ្ឋបាលខេត្តចុះចាប់ដើម្បីដោះស្រាយជាសំណងសម្រាប់ការខូចខាត។
ចំណែកលោក អុី សុខឡេង អភិបាលរងខេត្តព្រះសីហនុ ទទួលបន្ទុកការងារនេះ បានមានប្រសាសន៍ប្រាប់ VD7NEWS ថា ជាគោលការណ៍លោកចង់ឲ្យសារព័ត៌មានផ្សព្វផ្សាយជាសាធារណៈពាក់ព័ន្ធនិងការចូលរួមសហការថែរក្សាការ៉ូឡាបើមានយានយន្តឬមធ្យោបាយធ្វើដំណើរណាដែលធ្វើឲ្យបាក់បែកខូចខាតត្រូវរាយការណ៍មកក្រុមការងារខេត្ត បើគ្មានការសហការឬមានបាក់បែកនៅទីតាំងណា គឺឲ្យម្ចាស់ទីតាំងនោះទទួលខុសត្រូវជួសជុលសងរដ្ឋ ហើយរដ្ឋបាលខេត្តក៏ធ្លាប់បានកោះហៅប្រជាពលរដ្ឋ ដែលមានទីតាំងតាមផ្លូវការ៉ូឡាខូច ខាងលើបានចំនួន៦លើក បានជាង៦០ ខ្នងផ្ទះផងដែរ។ លោកបន្តថា ចំពោះការ៉ូឡា ទី១ សម្រាប់តែអ្នកថ្មើរជើង ទី២ សម្រាប់តែរទេះជនពិការ ទី៣ សម្រាប់តែជិះកង់ហាត់ប្រាណ។ លោកបញ្ជាក់ថា ចំពោះប្រជាពលរដ្ឋលើកឡើងថា អ្នកផ្សេងធ្វើបែកបែរជាមកចាប់ពួកគាត់ឲ្យសង ជាដំបូងនេះជាគោលការណ៍ពួកគាត់ត្រូវតែទទួលខុសត្រូវសង បន្ទាប់ពីពួកគាត់ទទួលខុសត្រូវថ្លៃចំណាយហើយពួកគាត់ត្រូវសហការសម្រាប់ពេលក្រោយបើមានមធ្យោបាយណាធ្វើឲ្យខូចខាតទៀតឲ្យពួកគាត់រាយការណ៍មកយើង តាមរយៈលេខទូរស័ព្ទ៣ ខ្សែរខាងក្រោមនេះ 012988573 / 015737756 /0888699666។
គួររម្លឹកជូនដែរថា កាលពីពេលកន្លងទៅ VD7NEWS បានលើកឡើងថា! សមិទ្ធិផលការ៉ូឡា,ថ្មក្រានីតប្រព័ន្ធលូ កូនឈើតាមចិញ្ចើមផ្លូវក្នុងក្រុង/ខេត្តព្រះសីហនុ ក្រោយពីធ្វើពិធីប្រគល់និងទទួលដាក់ឲ្យប្រើប្រាស់ផ្លូវទាំង៣៧ខ្សែរ មិនបានមួយដង្ហើយក្តាមផង ចំណាយប្រាក់អស់រាប់រយលានដុល្លាសហរដ្ឋអាមេរិច ត្រូវបានរងការខូចខាតជាបណ្តើរៗហើយ ប្រហែលជាង១០០០កន្លែង ដោយសារតែការស្ថាបនាមិនមានគុណភាពនិងខ្វះការថែរទាំពីមន្ទីរជំនាញពាក់ព័ន្ធ និងអាជ្ញាធរមូលដ្ឋាន ឬយ៉ាងណា។
ទាកទងនិងថវិការស្ថាបនាផ្លូវ នៅខេត្តព្រះសីហនុអ្នកសារព័ត៌មានយើងបានឃើញអនុក្រឹត្យមួយ តាមសំណើររបស់រដ្ឋមន្រ្តីក្រសួងដែនដីនគររូបនីយកម្មនិងសំណង់។
ការស្ថាបនាផ្លូវចំនួន៣៤ខ្សែ នៅខេត្តព្រះសីហនុ គឺថ្នូរនឹងការកាត់ដីរដ្ឋឲ្យទៅក្រុមហ៊ុន OCIC របស់ឧកញ៉ា ពុង ឃាវសែ ធ្វើជាកម្មសិទ្ធិ កាលពីអំឡុងចុងឆ្នាំ២០១៩កន្លងទៅ រាជរដ្ឋាភិបាលកម្ពុជា ធ្លាប់បានសម្រេចធ្វើអនុបយោគដីតំបន់អភិរក្សទឹកសាបបឹងព្រែកទប់ ទំហំ៣៤ ៦៦៦ម៉ែត្រក្រឡា ស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ដែលជាដីទ្រព្យសម្បត្តិសាធារណៈរបស់រដ្ឋ ទៅជាដីឯកជនរបស់រដ្ឋ និងផ្ដល់ជាកម្មសិទ្ធិឯកជនជូនក្រុមហ៊ុន អូវើស៊ី ខេមបូឌាន អ៊ិនវេសមេន ខបភើរេសិន ( Overseas Cambodian Investment Corporation-OCIC ) របស់ឧកញ៉ា ពុង ឃាវសែ ជាថ្នូរនឹងការចំណាយថវិកាសម្រាប់ការស្ថាបនាផ្លូវក្រុងចំនួន៣៤ខ្សែ ក្នុងខេត្តព្រះសីហនុ ដោយស្មារតីអនុក្រឹត្យលេខ ១៦២អនក្រ.បក ចុះថ្ងៃទី០៦ ខែវិច្ឆិកា ឆ្នាំ២០១៩ ។
លើសពីនេះ កាលពីដើមខែកញ្ញា ឆ្នាំ២០១៩ រាជរដ្ឋាភិបាលកម្ពុជា ក៏ធ្លាប់បានធ្វើអនុបយោគដីសាធារណៈរបស់រដ្ឋ ទំហំ២៤ ៦៥២ម៉ែត្រក្រឡា ស្ថិតនៅបណ្ដោយផ្លូវ២ធ្នូ ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ទៅជាដីឯកជនរបស់រដ្ឋ និងផ្ដល់ជាកម្មសិទ្ធិជូនក្រុមហ៊ុន OCIC ផងដែរ ដោយស្មារតីអនុក្រឹត្យលេខ ១២៦អនក្រ.បក ចុះថ្ងៃទី០២ ខែកញ្ញា ឆ្នាំ២០១៩ ។
ដូច្នេះ ដីរដ្ឋទំហំ ៥៩ ៣១៨ម៉ែត្រក្រឡា ( ជិត៦ហិកតា ) ស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ត្រូវបានរាជរដ្ឋាភិបាលកម្ពុជា សម្រេចធ្វើអនុបយោគប្រគល់ឲ្យក្រុមហ៊ុន OCIC ធ្វើជាកម្មសិទ្ធិ កាលពីអំឡុងឆ្នាំ២០១៩ រួចទៅហើយ ។ការស្ថាបនាផ្លូវចំនួន៣៤ខ្សែ នៅខេត្តព្រះសីហនុ ត្រូវបានចំណាយថវិកាប្រមាណជាង ២០០លានដុល្លារអាមេរិក ៕ ដោយ៖ VD7NEWS
Discussion about this post