យុទ្ធនាការអន្ទាក់សូន្យ របស់ក្រសួងបរិស្ថាន នៅក្រុងបានលុង

ខេត្តរតនគិរី ៖ យុទ្ធនាការអន្ទាក់សូន្យត្រូវបានក្រសួងបរិស្ថានរៀបចំធ្វើនៅក្រុងបានលុង ខេត្តរតនគិរី នាព្រឹកថ្ងៃទី៤ ខែកញ្ញា ឆ្នាំ២០២២ ជាយុទ្ធនាការលើកទី៦ បន្ទាប់ពីខេត្តស្ទឹងត្រែង ព្រះវិហារ ក្រចេះ មណ្ឌលគិរី និងខេត្តកំពងធំ ក្រោមអធិបតីភាព ឯកឧត្តម នេត្រ ភក្ត្រា រដ្ឋលេខាធិការ ក្រសួងបរិស្ថាន និងជាប្រធានក្រុមការងារយុទ្ធនាការ ឯកឧត្តម ស៊ឹម សនឡៃ សមាជិកក្រុមប្រឹក្សាខេត្ត តំណាងឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត និងឯកឧត្តមញ៉ែម សំអឿន អភិបាលខេត្តរតនគិរី ។

ថ្លែងនៅក្នុងយុទ្ធនាការ”អន្ទាក់សូន្យ” នេះឯកឧត្តម ញ៉ែម សំអឿន អភិបាលខេត្តរតនគិរីបានសម្តែងនូវការគាំទ្រប្រត្តិបត្តិ យុទ្ធនាការនេះ និងប្តេជ្ញាទប់ស្កាត់ និងបង្រ្កាបការបរបាញ់ ជួញដូរសត្វព្រៃ តាមរយៈចូលរួមផ្សព្វផ្សាយ និងអប់រំ ជាសាធារណៈ អំពីផលប៉ះពាល់អវិជ្ជមាន នៃអន្ទាក់ចាប់សត្វព្រៃ ផលប៉ះពាល់នៃការបរិភោគសត្វព្រៃ ព្រមទាំងគ្រោះថ្នាក់កើតឡើងក្នុងអំឡុងពេលដាក់អន្ទាក់។ ផ្សព្វផ្សាយច្បាប់ពាក់ព័ន្ធនឹងធនធានធម្មជាតិ សត្វព្រៃ ព្រៃឈើ និងអត្ថប្រយោជន៍នៃការថែរក្សាសត្វព្រៃ ស្ដីពីតម្លៃមិនអាចកាត់ថ្លៃបាន។ ជម្រុញការអនុវត្តន៍ការងារការពារ និងអភិរក្ស ធនធានធម្មជាតិ ដល់កងកម្លាំងប្រដាប់អាវុធទាំង៣ប្រភេទ សហការជាមួយអង្គភាពពាក់ព័ន្ធ ជាពិសេស មន្ទីរបរិស្ថានខេត្តរតនគិរី ខណ្ឌរដ្ឋបាលព្រៃឈើ ខណ្ឌរដ្ឋបាលជលផល និងអាជ្ញាធរមូលដ្ឋាន ចុះទប់ស្កាត់ និងបង្រ្កាបការបរបាញ់សត្វព្រៃ ការជួញដូរសត្វ និងសាច់សត្វព្រៃ ទៅតាមការចាំបាច់ និងភាពបន្ទាន់។ ហើយលើកទឹកចិត្តអង្គភាពមានសមត្ថកិច្ច ភាគីពាក់ព័ន្ធ និងដៃគូរសហការទាំងអស់ រួមគ្នាទប់ស្កាត់ការដាក់អន្ទាក់សត្វព្រៃ ដោយផ្តល់នូវជម្រើសថ្មីដើម្បីការពារ និងអភិរក្សធនធានធម្មជាតិ។ ចូលរួមលើកស្ទួយវិស័យអេកូទេសចរណ៍ធម្មជាតិក្នុងតំបន់ ដែលជាប្រភពធនធាន ដែលមិនរីងស្ងួតក្នុងការស្វែងរកប្រាក់ចំណូលសម្រាប់សហគមន៍ អាចចូលរួចកាត់បន្ថយបទល្មើសធនធានធម្មជាតិផ្សេងៗ។

ថ្លែងនៅក្នុងយុទ្ធនាការនេះផងដែរ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន និងជាប្រធានយុទ្ធនាការអន្ទាក់សូន្យ បានថ្លែងអំណរគុណដល់ដៃគូអភិវឌ្ឍន៍ និងអង្គការអភិរក្សទាំងអស់ ដែលធ្វើការជាមួយរាជរដ្ឋាភិបាលកម្ពុជា ដើម្បីដោះស្រាយវិបត្តិអន្ទាក់បំផ្លាញសត្វព្រៃនេះ។ ឯកឧត្តមបានបន្តថា ការអនុវត្តច្បាប់ប្រកបដោយប្រសិទ្ធភាព និងការអភិវឌ្ឍន៍សេដ្ឋកិច្ចត្រូវតែដើរទន្ទឹមគ្នា ដើម្បីលុបបំបាត់ការដាក់អន្ទាក់ នៅក្នុងតំបន់ការពារធម្មជាតិ ទើបអាចផ្តល់ជម្រកសុវត្ថិភាពដល់សត្វព្រៃ។
ជាមួយគ្នានេះដែរ ឯកឧត្តម នេត្រ ភក្ត្រា បានជំរុញឲ្យប្រជាពលរដ្ឋបញ្ឈប់ការបរបាញ់ ការដាក់អន្ទាក់ ជួញដូរ និងបរិភោគសត្វព្រៃ ពីព្រោះថា ការទទួលទានសត្វព្រៃ មិនធ្វើឲ្យសុខភាពមនុស្សប្រសើរឡើងនោះទេ សាច់សត្វព្រៃ និងផ្នែកផ្សេងៗនៃសត្វព្រៃ មិនគួរប្រើប្រាស់សម្រាប់ធ្វើជាឱសថនោះឡើយ ហើយការកើនឡើងនៃការប៉ះពាល់មនុស្សទៅសត្វបង្កើនហានិភ័យនៃការរីករាលដាលមេរោគ និងជំងឺផ្សេងៗ។

ឯកឧត្តម រដ្ឋលេខាធិការបានអំពាវនាវដល់ប្រជាពលរដ្ឋទាំងអស់នៅទូទាំងប្រទេសកម្ពុជា ឈប់ទិញ លក់ និងប្រើបរិភោគសត្វព្រៃ។ ត្រូវចូលរួមជាមួយក្រសួង និងដៃគូរ ដើម្បីលុបបំបាត់ បញ្ចប់វិបត្តិអន្ទាក់ ប្រយុទ្ធប្រឆាំងនឹងការជួញដូរសត្វព្រៃ ក៏ដូចជាការពារសត្វព្រៃ និងធនធានធម្មជាតិ។

សូមបញ្ជាក់ថា រយៈពេល៥ឆ្នាំ (២០១៨-២០២២) មន្ទីរបរិស្ថានខេត្តរតនគិរីសម្រេចលទ្ធផលនៃការអនុវត្តច្បាប់ និងបង្ក្រាបបទល្មើសធនធានធម្មជាតិ ក្នុងតំបន់ការ
ពារធម្មជាតិ រួមាន ៖ ចុះល្បាតបានចំនួន ៦០១៥ លើក បង្គ្រាបបទល្មើសបាន ១,១២០ ករណី, បញ្ជូនសំណុំរឿងទៅតុលាការ ១០១ ករណី រឹបអូសរណាយន្តបាន ២៤៥គ្រឿង,ចាប់រថយន្ត២គ្រឿង,ចាប់គោយន្កន្ត្រៃ ៧គ្រឿង,ដោះអន្ទាក់បាន៣១៩៧ខ្សែ,ដោះអង្គប់ចាប់សត្វព្រៃបាន ១៧១អង្គប់,ដោះខ្សែលួសឆក់សត្វព្រៃបាន៣៣៤០ម៉ែត្រ,ក្បាលឆក់សត្វព្រៃបាន ១១គ្រឿងនិងមងសម្រាប់ទាក់សត្វព្រៃបាន ២៣ ត្បូង៕ ដោយ ភួង ផុន