លោកជំទាវ ហ៊ុន ស៊ីណាត ចុះពិនិត្យសំណង់សាលារៀន នៅភូមិបរឡយ

លោកជំទាវ ហ៊ុន ស៊ីណាត ចុះពិនិត្យសំណង់សាលារៀន នៅភូមិបរឡយ

ខេត្តរតនគិរី ៖ ប្រជាពលរដ្ឋនៅភូមិបរឡយ ជាង១០០គ្រួសារ ទទួលបានអំណោយសប្បុរសធម៌ ពីលោកជំទាវ ហ៊ុន ស៊ីណាត គ្រាដែលលោកជំទាវ ចុះពិនិត្យសំណង់សាលារៀន។

 នៅព្រឹកថ្ងៃទី០៨ ខែមិថុនា ឆ្នាំ២០២២ លោកជំទាវ ហ៊ុន ស៊ីណាត ដឹកនាំសប្បុរសជន ដែលមានលោក ជិន សំណាង ចូលរួម ព្រមទាំងមានការអមដំណើរពីសំណាក់លោកអធិការនគរបាលស្រុកបរកែវ បានអញ្ជើញចុះពិនិត្យសំណង់សាលាមតេយ្យ ស្ថិតក្នុងភូមិបរឡយ ឃុំកិៈចុង ស្រុកបរកែវ ខេត្តរតនគិរី ដែលជាអំណោយរបស់លោកជំទាវ។ គ្រានោះលោកជំទាវក៏បាននាំយកអំណោយចែកជូនប្រជាពលរដ្ឋចំនួន ១០៨គ្រួសារ។ ក្នុងមួយគ្រួសារ ទទួលបាន អង្ករ ២៥គីឡូក្រាម មី៥០កញ្ចប់ និងថវិកា ចំនួន ៥០០០០រៀល។

 បើយោងតាមការឲ្យដឹងពីមេជាងសំណង់បានឲ្យដឹងថា សំណង់សាលាមតេយ្យ ដែលជាអំណោយរបស់លោកជំទាវ មានឈ្មោះ ហ៊ុន ស៊ីណាត បរឡយ មានទំហំ ៦ម៉ែត្រ × ៣០ម៉ែត្រ ថែមវេរ៉ង់ដា ៣ម៉ែត្រ × ៦ម៉ែត្រ បន្ទប់ទឹក៣ មានទាំងតុ កៅអី ក្ដាឃៀន សរុបថវិការ អស់ចំនួន ៥ម៉ឺន ៣ពាន់ដុល្លា សហរដ្ឋអាមេរិក។ លោកមេជាងបានបញ្ជាក់ទៀតថា សំណង់នេះ ចាប់ផ្ដើមសាងសង់តាំងពីខែមេសា ឆ្នាំ២០២២ ហើយរួចរាល់នៅក្នុងអំឡុងខែកក្កដា ឆ្នាំ២០២២ ខាងមុខនេះ។

 លោកអធិការនគរបាលស្រុកបរកែវ លោកមេឃុំកិៈចុង ព្រមទាំងប្រជាពលរដ្ឋ និងព្រះចៅអធិការ វត្ដបរឡយ ភូមិបរឡយ ស្រុកបរកែវ ខេត្តរនគិរី បានថ្លែងអំណរគុណយ៉ាងខ្លាំង ចំពោះអំណោយសប្បុរសធម៌ សាងសង់សាលារៀន ជូនដល់ក្មេងៗ នៅតំបន់ដាច់ស្រយាល ឲ្យមានសាលារៀននឹងគេ និងថវិការ គ្រឿងឧបភោគ បរិភោគ ដែលលោកជំទាវបានលះបង់ ចែករំលែក យ៉ាងច្រើនសន្ធឹកសន្ធាប់ ធ្វើឲ្យពួកគាត់មានចិត្តត្រេកអរយ៉ាងខ្លាំង រកអ្វីប្រៀបផ្ទឹមពុំបាន។ 

ជាចុងក្រោយពួកគាត់បានលើកម្រាមដៃដប់បួងសួង ដល់អារក្ស អ្នកតាព្រៃភ្នំ ម្ចាស់ទឹក ម្ចាស់ដី ខរត្តនគិរី ជួយតាមថែរក្សា លោកជំទាវ ក្រុមគ្រួសារ និងសហការី ឲ្យមានអាយុយើនយូរ ព្រមទាំងមានសុខភាពល្អ ដើម្បីជួយដល់ប្រជាជនខ្មែរ ក្រីក្របន្តទៅមុខទៀត៕ ដោយ ភួង ផុន