តុលាការ រាជធានីភ្នំពេញបានចេញដីកាឱ្យនាំខ្លួន លោក អេង អូន ពាក់ព័ន្ធបទល្មើសច្រើនករណី

ភ្នំពេញ៖ លោក​​ អេង​ អូន​ ដែលគេស្គាល់ថាជា ឈ្មួញលក់គ្រឿងសំណង់ កាយអាចម៍ដីលក់ និងជាប្រធានក្រុមហ៊ុនអភិវឌ្ឍន៍ភ្នំថ្កូវ (អត់ច្បាប់ត្រូវបានក្រសួងរ៉ែផាកពិន័យ)ដែលមានតួនាទីជាមន្ត្រីយោធា រងទ័ពអាកាសនៅមូលដ្ឋានកងកេង ខេត្តព្រះសីហនុ  ពេលនេះ​ត្រូវ​បាន​តុលាការ​រាជធានីភំ្នពេញចេញដីកា​រឲ្យ​នាំខ្លួនហើយ តែមានអ្នកកាងមិនឲ្យចេញពីបន្ទាយ។

បើយោងតាម ដីកាបង្គាប់ឱ្យនាំខ្លួន លេខ ៨៥៤ សដចន ចុះថ្ងៃទី១៤ ខែកញ្ញា ឆ្នាំ២០២១ របស់សាលាដំបូងរាជធានីភ្នំពេញ បង្គាប់ឱ្យនាំខ្លួនឈ្មោះ អេង អូន អាយុ ៤២ឆ្នាំ ជនជាតិខ្មែរ មានអាសយដ្ឋាន នៅភូមិព្រៃនប់២ ឃុំព្រៃនប់ ស្រុកព្រៃនប់ ខេត្តព្រះសីហនុ មានប្រពន្ធឈ្មោះ ចាន់ ធួ មានកូន ០២នាក់ ឪពុក ឈ្មោះ ឯម ស៊ាងអេង (ស្លាប់) ម្ដាយឈ្មោះ ងិន ឡា (ស្លាប់)។ ពីបទគំរាមកំហែងនិងសម្លាប់ ពីបទឆបោក បទរំលោភលើទំនុកចិត្ត តាមបញ្ញត្តិមាត្រា២៣៣ មាត្រា៣៧៧ មាត្រា៣៧៨ មាត្រា៣៩១ និងមាត្រា៣៩២ ប្រព្រឹត្តនៅខេត្តកំពត ខេត្តព្រះសីហនុ និងរាជធានីភ្នំពេញ ក្នុងអំឡុងឆ្នាំ២០២០ ដល់ឆ្នាំ២០២១។

លោក អេង អូន ត្រូវបានឯកឧត្ដម ស៊ុយ សែម រដ្ឋមន្ត្រីក្រសួងរ៉ែ និងថាមពល សម្រេចផាកពិន័យជាទឹកប្រាក់ជាង ៨០០លានរៀល ដោយសារតែក្រុមហ៊ុនអភិវឌ្ឍភ្នំថ្កូវរបស់លោក បានកាយយកដីក្រហមមុនទទួលបានអាជ្ញាប័ណ្ណ។ ប៉ុន្តែ រហូតមកទល់ពេលនេះ លោក អេង អូន ប្រធានក្រុមហ៊ុនអភិវឌ្ឍន៍ភ្នំថ្កូវ បានគេចវេសដោយហេតុផលផ្សេងៗ មិនព្រមបង់ប្រាក់ផាកពិន័យ តាមការសម្រេចរបស់លោករដ្ឋមន្ត្រីក្រសួងរ៉ែ នៅឡើយទេ។ ក្រោយពីតុលាការចេញដីកាឱ្យនាំខ្លួនលោក រួចមក លោក អេង អូន បានកំពុងរត់លាក់ខ្លួនក្នុងអង្គភាពមួយនៅភ្នំពេញ ដែលមានអ្នកកាងនៅពីក្រោយ មិនឱ្យចេញពីបន្ទាយដើម្បី ឱ្យតុលាការអនុវត្តតាមនីតិវិធីទេ។ ចំពោះបញ្ហានេះ អ្នកសារព័ត៌មាន មិនអាចទាក់ទង លោក អេង អូន បានទេនៅថ្ងៃទី២៧ ខែកញ្ញា ឆ្នាំ២០២១។

ទាក់ទិននឹងករណីខាងលើ និងការសម្ងំលាក់ខ្លួនរបស់លោក អេង អូន នៅក្នុងបន្ទាយ (អង្គភាព) ក្រោមកិច្ចព្យាយាមសម្របសម្រួលករណីនេះ ជាមួយនឹងដើមបណ្ដឹង តាមរយៈលោក ហាក់​ សីលា នាយការិយាល័យបុគ្គលិកមូលដ្ឋានទ័ពអាកាស ដែលជាអ្នកផ្ដល់ទីកន្លែងលាក់ខ្លួនគេចពីតុលាការ។

ហើយបើតាមប្រភពព័ត៌មានច្បាស់ការ១ទៀតកាលពីថ្ងៃមិញប្រពន្ធលោកអូនបានចូលទៅជួបលោកអូននៅបន្ទាយទ័ពអាកាស ហើយបានសុំកិច្ចអន្តរាគមន៍ពីលោកទិត្យសិលាឲ្យជួយរកវិធីដើម្បីសម្របសម្រួល។

ករណីនេះ លោក ហាក់​ សីលា មិនបានឆ្លើយតបនឹងអ្នកសារព័ត៌មាន ចំពោះការបញ្ជាក់ពីមូលហេតុ ករណីខាងលើនៅឡើយទេនារសៀលថ្ងៃទី ២៧ ខែកញ្ញាឆ្នាំ ២០២១នេះ។

អង្គភាព VD7NEWS យើងខ្ញុំរង់ចាំការបកស្រាយនិងបំភ្លឺគ្រប់ភាគី៕