ខេត្តរតនគិរី ៖ ជនសង្ស័យចំនួន២នាក់ និងអាវុធវែងមួយដើម ត្រូវបានកម្លាំងនគរបាលស្រុកលំផាត់ ខេត្តរតនគិរី ឃាត់ខ្លួនបញ្ជូនទៅស្នងការខេត្ត បន្ទាប់ពីជនសង្ស័យទាំង២នាក់នេះ យកកាំភ្លើងទៅបង្កជំលោះដល់ផ្ទះជនរងគ្រោះ។
ហេតុការនេះបានកើតឡើងនៅវេលាម៉ោង៧.៣០នាទី យប់ថ្ងៃទី៥ ខែកម្ភៈ ឆ្នាំ២០២១ នៅចំណុចចំការក្រូចជនរងគ្រោះឈ្មោះ ឈាង ម៉ុងខេង ស្ថិតក្នុងភូមិព្រួក ឃុំបាតាង ស្រុកលំផាត់ ខេត្តរតនគិរី។ ជនសង្ស័យទាំង ២នាក់ ម្នាក់មានឈ្មោះ ស៊ីម សុខនៅ ហៅខែម ភេទប្រុស អាយុ៣១ឆ្នាំ ជនជារិខ្មែរ មានលំនៅភួមិឃុំកើតហេតុខាងលើ និងម្នាក់ទៀតមានឈ្មោះ ខុម សាវេត ប្រុស អាយុ១៧ឆ្នាំ ជនជាតិខ្មែរ រស់នៅភូមិឃុំជាមួយគ្នា។
បើយោងតាមការឲ្យដឹងពីជនរងគ្រោះឈ្មោះ ឈាង ម៉ុងខេង បានឲ្យដឹងថា លោកបានដាក់ពាក្យបណ្ដឹងចោទប្រកាន់ពីបទប៉ុនប៉ងធ្វើឃាយដោយចេតនា ពីព្រោះជនសង្ស័យឈ្មោះ ស៊ីម សុខនៅ ជាមេការធ្វើចំការរបស់លោកជាច្រើនឆ្នាំមកហើយ តែចំឡែកប៉ុន្មានខែចុងក្រោយនេះ ឈ្មោះ ស៊ីម សុខនៅ ហាក់មានចរិកច្រងេងច្រងាង និយាយមិនស្ដាប់លោកជាថៅកែសោះ។ លុះថ្ងៃកើតហេតុលោក ឈាង ម៉ុងខេង ជាម្ចាស់ចំការបានទូរស័ព្ទហៅឈ្មោះ ស៊ីម សុខនៅ ជាមេការឲ្យមកទូទាត់ប្រាក់បំណាច់ខែ ក្រោយពេលមេការរូបនេះ បានយកប្រាក់ពីលោកទៅចំណាយក្នុងការជួលកម្មករថែរទាំចំការកន្លងមកមួយខែ។ លុះដល់យប់ម៉ោង៧.០០នាទី ស្រាប់តែឃើញ ស៊ីម សុខនៅ ជាមេការរបស់លោក ជិះម៉ូតូគ្នា២នាក់ ជាមួយឈ្មោះ ខុម សាវេត ចូលមកនិយាយស្ដីខុសពីធម្មតា ដូច្នេះរូបគាត់ និងបងប្រុសបង្កើតម្នាក់មានការសង្ស័យ ក៏និយាយលួងលោមពន្យាពេល ដើម្បីផ្ដល់ដំណឹងជូនសមត្ថកិច្ចចុះមកអន្តរាគមន៍ គ្រានោះដែរលោក ឈាង ម៉ុងខេង ក៏មានការសង្ស័យបានដើរទៅមើលម៉ូតូឃើញមានកាំភ្លើងវែង១ដើមមិនស្គាល់ម៉ាក ដាក់អែបបណ្ដោយម៉ូតូ លោកក៏សម្រេចចិត្តស្ទុះទៅយកកាំភ្លើង ដើម្បីកុំឲ្យមានបញ្ហាកើតឡើង។ គ្រានោះជនសង្ស័យស្ទុះចូលប្រតាយប្រតប់ តែត្រូវបងប្រុសលោកយករណាយន្តមកគំរាមថា បើហ៊ានចូលអាញ់កាត់ គ្រានោះទើបជនសង្ស័យលែងចូលដណ្ដើមកាំភ្លើង។ ហើយកម្លាំងនគរបាលអធិការស្រុកលំផាត់ ក៏ចុះមកដល់ ហើយលោកក៏បានប្រគល់កាំភ្លើងវែង១ដើម បង់១ គ្រាប់៥គ្រាប់ ជូនសមត្ថកិច្ចក្នុងគ្រានោះតែម្ដង។ លោក ឈាង ម៉ុងខេង ជាជនរងគ្រោះបានបន្តថា គាត់បានសួរទៅជនសង្ស័យជាមិត្តភ័ ក្ដរបស់ឈ្មោះ ស៊ីម សុខនៅ គាត់ថា កាំភ្លើងនេះរបស់ពូគាត់ ជានគរបាល អធិការរងស្រុកលំផាត់។ លោក ឈាង ម៉ុងខេង បានបញ្ជាក់ថា ឈ្មោះ ស៊ីម សុខនៅ បានស្នាក់នៅមើលចំការឱ្យលោករយៈពេល ៥-៦ឆ្នាំមកហើយ តែបុគ្គលនេះមួយរយៈពេលក្រោយមក មិនប្រឹងប្រែងធ្វើការងារទេ ហើយគម្រាមបើកប្រាក់ខែឲ្យគ្រប់ចំនួន ជាក់ស្តែងនាំមិត្តភក្តិ និងអាវុធវែងមកគម្រាមដល់ចំការគាត់តែម្តង។ លោកបានបន្ថែមថា លោកមានការភ័យខ្លាចជនសង្ស័យលួចត្រឡប់មកវិញធ្វើឃាតគាត់ គ្រាដែលលោកឃើញសមត្ថកិច្ចនាំខ្លួនជនសង្ស័យទៅ ដោយទុកឲ្យជនសង្ស័យទាំង២នាក់ មានសេរីភាពជាធម្មតា។
ពាក់ព័ន្ធករណីនេះដែរ លោក កុល ថឺង អធិការនគរបាលស្រុកលំផាត់បានអោយដឹងថា ជនសង្ស័យរួមទាំងវត្ថុតាងកាំភ្លើង កម្លាំងរបស់លោកបានកសាងសំណុំរឿងបញ្ជូនទៅស្នងការនគរបាលខេត្តហើយ ចំណែកកាំភ្លើងពិតជារបស់លោក អេង សារ៉ន អធិការរង នគរបាលស្រុកលំផាត់មែន។
ចំណែកលោក អេង សារ៉ន អធិការរងនគរបាលស្រុកលំផាត់បានឲ្យដឹងនៅថ្ងៃទី៧ នេះថា ឈ្មោះ ខុម សាវេត ពិតជាក្មួយប្រុសរបស់លោកមែន។ ចំពោះថាក្មួយរបស់លោក យកកាំភ្លើងទៅមានទំនាស់យ៉ាងណានោះលោកមិនដឹងទេ។ ហើយកាំភ្លើងនេះចាស់ទុកចោលកៀនជញ្ជាំងផ្ទះយូរណាស់មកហើយ មិនដឹងថាក្មួយរបស់លោកលួចយកទៅពីពេលណានោះទេ។
ប្រភពព័ត៌មានមួយបានខ្សឹបថា ជនសង្ស័យទាំង២នាក់ ករណីប៉ុនប៉ងមនុស្សឃាតកំពុងមានអ្នកអន្តរាគមន៍ ដើម្បីសម្របសម្រួលក្រៅប្រព័ន្ធច្បាប់ ដោយបង្វែរសាច់រឿងពីបទប៉ុនប៉ងមនុស្សឃាតមកបទប្រើប្រាស់អាវុធខុសច្បាប់វិញ៕ ដោយ ភួង ផុន
Discussion about this post