ពិធីប្រកាសតែងតាំងប្រធានមន្ទីរវប្បធម៌ថ្មីជាផ្លូវការ នៅព្រឹកមិញនេះ​

ខេត្តព្រះសីហនុ៖ លោក ប៊ុត បុប្ផា ត្រូវបានប្រកាសតែងតាំងជាប្រធានមន្ទីរវប្បធម៌ និងវិចិត្រសិល្បៈខេត្តព្រះសីហនុជាផ្លូវការ ជំនួសលោក ដេត ណូ ដែលត្រូវបានចូលនិវត្តន៍។
ពិធីប្រកាសតែងតាំងចូលកាន់មុខតំណែងរបស់ប្រធានថ្មីនៃមន្ទីរវប្បធម៌នេះ បានធ្វើឡើងនៅថ្ងៃទី២៥ ខែមករា ដោយមានការចូលរួមពីលោក ស្រី សួន រដ្ឋលេខាធិការក្រសួងវប្បធម៌ និងចិត្រសិល្បៈ និងលោក គួច ចំរើន អភិបាលខេត្តព្រះសីហនុ។

លោក គួច ចំរើន បានវាយតម្លៃខ្ពស់ចំពោះមន្ទីរវប្បធម៌ និងវិចិត្រសិល្បៈ ដែលកន្លងមកបានខិតខំ ក្នុងការថែរក្សា អភិរក្សវប្បធម៌ ប្រពៃណី ទំនៀមទម្លាប់ ដើម្បីធ្វើយ៉ាងណាឱ្យកូនចៅជំនាន់ក្រោយ បានយល់ និងថែរក្សានូវទំនៀមទម្លាប់ ប្រពៃណី ដែលមានតាំងពីដូនតាមក ហើយក្នុងនោះ មន្ទីរវប្បធម៌ និងវិចិត្រសិល្បៈ បានខិតខំក្នុងការបណ្ដុះបណ្ដាលនូវធនធានមនុស្ស ទាំងវិស័យឯកជន និងរដ្ឋ ក្នុងការលើកស្ទួយវប្បធម៌របស់ជាតិឱ្យបានគង់វង្សយូរអង្វែង។

មិនតែប៉ុណ្ណោះមន្ទីរវប្បធម៌ ក៏បានខិតខំថែរក្សាអភិរក្សកេរមរតកដូនតា ដែលមាននៅក្នុងភូមិសាស្ត្រនៃខេត្តព្រះសីហនុ ទាំងទំនៀមទម្លាប់ ប្រពៃណី វប្បធម៌ ក៏ដូចជាសិល្បៈបុរាណ សម័យ និងវត្ថុបុរាណផ្សេងៗដើម្បីធ្វើយ៉ាងណា ទុកជាកេរមរតក សម្បត្តិបេតិកភណ្ឌរបស់ជាតិ ឱ្យបានគង់វង្ស សម្រាប់កូនចៅជំនាន់ក្រោយបានឃើញ និងយល់ដឹងអំពីស្នាដៃវប្បធម៌របស់ជាតិ។

ក្នុងឱកាសនោះដែរ លោក ស្រី សួន ក៏បានលើកឡើងថា ដើម្បីពង្រឹងនូវគុណភាពក្នុងការគ្រប់គ្រងថែរក្សាអភិរក្សវប្បធម៌ប្រពៃណីទំនៀមទម្លាប់របស់ខ្មែរ ដូចនេះ សូមឱ្យលោក ប៊ុត បុប្ផា ដែលត្រូវបានក្រសួង មានទំនុកចិត្ត និងតែងតាំងជាប្រធានមន្ទីរវប្បធម៌ និងវិចិត្រសិល្បៈខេត្តព្រះសីហនុពេលនេះ ត្រូវពង្រឹង និងសហការ រួបរួមសាមគ្គីផ្ទៃក្នុងរវាងមន្ត្រី ក្រោមឱវាទ និងស្ថាប័នពាក់ព័ន្ធនានា ដើម្បីអនុវត្តឱ្យស្របតាមលិខិតបទដ្ឋានគតិយុត្តរបស់រាជរដ្ឋាភិបាល ហើយត្រូវបំពេញការងារ និងគោរពតួនាទី ត្រូវនាំគ្នាអភិវឌ្ឍន៍មន្ទីរវប្បធម៌ និងវិចិត្រសិល្បៈខេត្តព្រះសីហនុ ឱ្យកាន់តែរីកចម្រើន៕