ស្នងការខេត្តឧត្តរមានជ័យ​មិនខ្វល់ពីគោលនយោបាយភូមិឃុំមានសុវត្ថិភាព​របស់ប្រមុខរាជរដ្ឋាភិបាល ទុកអោយពលរដ្ឋរងគ្រោះរាល់ថ្ងៃ​

ខេត្តឧត្ដរមានជ័យ៖ ក្រោមការខិតខំប្រឹងប្រែងរបស់ប្រមុខរាជរដ្ឋាភិបាល ដឹកនាំដោយសម្ដេចតេជោ ហ៊ុន សែន ដើម្បីអោយប្រជាពលរដ្ឋ រស់នៅប្រកបដោយសុខសុ​វត្ថិភាព សេចក្ដីថ្លៃថ្នូរ និងសុភង្គល ក្រោមដំបូលសន្តិភាព មិនត្រឹមតែប៉ុណ្ណោះ ប្រមុខរាជរដ្ឋាភិបាល ខិតខំរិះរកគ្រប់មធ្យោបាយ​ ដើម្បីតាក់តែងច្បាប់​ និងបង្កើតច្បាប់ និងគោលនយោបាយភូមិឃុំ ឲ្យមានសុវត្ថិភាព និងដាក់ចេញអោយមន្រ្ដីថ្នាក់ក្រោម​ជាតិ យកមកអនុវត្ដ។ តែគួរអោយសោកស្ដាយ​ ដែលមន្រ្ដីថ្នាក់ក្រោម​ មិនបានអនុវត្ដតាម។

ជាក់ស្ដែងនៅខេត្តឧត្ដរមានជ័យ អាជ្ញាធរមានសមត្ថកិច្ច បានបណ្ដែតបណ្ដោយអោយកើតមានល្បែងឆ្នោតកន្ទុយលេខ កើតមានយ៉ាងអនាធិបតេយ្យ បណ្ដាលអោយពលរដ្ឋរងគ្រោះរៀងរាល់ថ្ងៃ ក្នុងស្រុកអន្លង់វែង​ ខេត្តឧត្ដរមានជ័យ។

នៅថ្ងៃទី២០ខែមករា ឆ្នាំ២០២១នេះ​ មានសេចក្ដីរាយការណ៍មកថា មានមេឆ្នោតធំៗ​ នៅស្រុកអន្លង់វែងជាច្រើននាក់​ ដែលបានស្គាល់ឈ្មោះតែ​ ៥នាក់។ ដូចជា ទី១​ -​ ឈ្មោះ ញ៉ែម បារមី ភេទស្រី នៅចំណុចរង្វង់មូលអន្លង់វែង ,ទី២​.ឈ្មោះ ហាក់ ស៊ីន ភេទស្រី នៅក្បែរផ្ទះសំណាក់ត្រពាំងប្រីយ៍ ,ទី៣​.ឈ្មោះ រតនៈ ជាងរថយន្ដ នៅកុងប៊ិញ ,ទី៤​.ឈ្មោះ សេក សុភាព ភេទស្រី ,ទី៥​.ឈ្មោះ​ លីណា ភេទស្រី។ មេឆ្នោតទាំង​ ៥នាក់​ ខាងលើ​នេះ​ បានដាក់ពង្រាយកូនកញ្រ្ចែងកត់ឆ្នោតកន្ទុយលេខ ពេញភូមិនៅតាមបណ្ដាឃុំទាំងអស់នៅក្នុងស្រុកអន្លង់វែងទាំងមូល។

ទោះជាពលរដ្ឋទទួលរងគ្រោះរាល់ថ្ងៃ​ ដោយសារល្បែងស៊ីសងខាងលើយ៉ាងណាក្ដី លោកឧត្ដមសេនីយ៍ទោ ហួត សុធី ស្នងការដ្ឋាននគរបាលខេត្តឧត្ដរមានជ័យ មិនឃើញមានសកម្មភាព​ ឬក៏ចំណាត់ការផ្លូវច្បាប់ណាមួយ​ ទៅលើមេខ្លោងទាំង​ ៥នាក់​ ខាងលើនោះទេ​។ លោកឧត្ដមសេនីយ៍ទោហួត សុធី បានអោយដឹងថា លោកបានបញ្ជាអោយអធិការចាត់វិធានការហើយ កុំអោយមានការពាក់ពន្ធ័៕ ដោយ៖ រ័ត្នផល្លា​