ជម្លោះដីធ្លីនៅឬទ្ធី២ ឃុំកែវផុសស្រុកស្ទឹងហាវ កើតឡើងដោយសារអ្វី?

ខេត្តព្រះសីហនុ៖ នៅចំណុចឃ្លងទ្រាក ស្ថិតក្នុងភូមិឫទ្ធី២ ឃុំកែវផុស ស្រុកស្ទឹងហាវ ខេត្ដព្រះសីហនុ ប្រជាពលរដ្ឋនិងលោកស្រី ខៃណារិន បានចោទប្រកាន់គ្នា រឿងដីធ្លី រហូតប្តឹងផ្តល់គ្នានៅសាលាដំបូងខេត្ត លើដីមិនទាន់មានប្លង់កម្មសិទ្ធិ ខណៈអាជ្ញាធរ បានប្រកាសដំបន់វិនិឆ្ឆ័យដើម្បីរៀបចំធ្វើប្លង់កម្មសិទ្ទិជូន ឲ្យពលរដ្ឋ។

ពលរដ្ឋខ្លះអះអាងថា ពួកគាត់ បានមករស់នៅទីនេះយូរឆ្នាំមកហើយ ដោយបានទិញដីធ្វើផ្ទះ ពីប្រជាពលរដ្ឋគ្នាឯង មិនមានអាជ្ញាធរដឹងឮទេ (ទិញតៗគ្នា) ស្រាប់តែនៅថ្ងៃទី២២ ខែធ្នូ ឆ្នាំ២០២០ កន្លងទៅថ្មីៗនេះ បក្ខពួកកូនចៅលោកស្រី ខៃ ណារិន បានដាក់គ្រឿងចក្រមកជីកប្រឡាយធ្វើរបងហ៊ុំព័ទ្ធយកដី និងផ្ទះ បំផ្លាញដំណាំ ពួកគាត់ តែលោកស្រីខៃណារិនថាទេ។

ទាន់ទងនិងរឿងខាងលើនេះ ព្រឹកថ្ងៃព្រហស្បតិ៍ ១កើត ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃ ទី១៤ ខែមករា ឆ្នាំ២០២១ លោក ផេង មីន មេឃុំកែវផុស និយាយថា សូមបដិសេធចំពោះក្រុមប្រជាពលរដ្ឋ អនាធិបតេយ្យ ដែលបានចោទប្រកាន់អាជ្ញាធរមូលដ្ឋានោះខុសហើយ តាមពិតពួកគាត់មិនមែនជាប្រជាពលរដ្ឋរស់នៅក្នុងមូលដ្ឋានឃុំនេះទេ គឺពួកគាត់មកពីខាងក្រៅមករស់នៅលើដីគេ ដែលដីទាំងនោះភាគច្រើនសុទ្ធតែមានប័ណ្ណ ហើយកន្លងមកឃុំក៍បានទទួល ការប្ដឹងតវ៉ានេះដែរ ហើយឃុំបានប្រាប់គាត់ជាញយៗថា បើមានឯកសារអ្វីពាក់ព័ន្ធ សូមយកទៅដាក់នៅស្រុក ព្រោះរឿងនេះ វាហួសសមត្ថកិច្ចឃុំ។ ទន្ទឹមនឹងនោះ លោកមេឃុំ ក៍បានចុះទៅផ្ទាល់ដល់ទីតាំងខាងលើនេះ ដើម្បីពិនិត្យមើលស្ថានភាពជាក់ ស្ដែង ប៉ុន្ដែក្រុមប្រជាពលរដ្ឋទាំងនោះ បានគម្រាមកំហែងគាត់ ហើយមិនស្ដាប់តាមការណែនាំទេ ហើយពួកគាត់នៅតែបន្ដ សាងសង់រោង ខ្ទម ឬផ្ទះលើដីនេះ រហូត ដល់មានការប៉ះទង្គិចហិង្សាបង្ករបួស្នាមជាមួយប្រជាពលរដ្ឋខាងភាគីលោកស្រី ខៃ ណារិន។

ចំពោះរឿងរ៉ាវខាងលើនេះ ភាគីលោកស្រី ខៃ ណារិន បានបដិសេធច្រានចោលតាមប្រព័ន្ធផ្សព្វផ្សាយមួយ ចំនួនតូច ថា អ្វីៗវាមិនពិតដូចការចោទប្រកាន់របស់ប្រជាពលរដ្ឋអនាធិបតេយ្យ និងប្រព័ន្ធផ្សព្វផ្សយនោះឡើយ។ លោកស្រី ធ្លាប់បាន សរសេរលិខិតបំភ្លឺជាសាធារណៈ ដែលមានស្នាមផ្ដិតមេដៃកាលពីថ្ងៃទី១៨ ខែធ្នូ ឆ្នាំ២០២០ បដិសេធពីការចុះផ្សាយព័ត៌មាន កន្លងមកថាមិនពិត និងមានភ្ជាប់ជាមួយនូវឯកសារផ្លូវការអំពីប្រវត្តិកាន់កាប់ដីទំនាស់នេះទៀតផង (មានលិខិតទិញលក់ មានអាជ្ញាធរឃុំដឹងឮ កាលពីមុនដីដំបន់នេះស្ថិតនៅឃុំជ្រោយស្វាយ ស្រុកស្រែអំបិល ក្រោយមកកាត់ចូលមកស្រុកស្ទឹងហាវ ខេត្ដព្រះសីហនុ)។ ផ្ទុយទៅវិញប្រជាពលរដ្ឋ ដែលរងគ្រោះដោយសារទិញដីពីជនអនាធិបតេយ្យកន្លងមកនេះ លោកស្រី បានដោះស្រាយផ្តល់ដីទំហំ ៥ គុណ ២០ ជូនក្រុមប្រជាពលរដ្ឋគ្រោះពិតប្រាកដ ហើយពួកគាត់ ស្ម័គចិត្ដរីករាយទទួលយក។

ចំណែកឯ លោក ឆាយ សុគន្ធដា អភិបាលស្រុកស្ទឹងហាវ ថ្លែងឱ្យដឹងថា កន្លងមក ទីតាំងហ្នឹង ប្រជាជនទាំងអស់ហ្នឹង ត្រូវបានលោកស្រី ខៃ ណារិន ប្ដឹងមករដ្ឋបាលស្រុកថា មានប្រជាពលរដ្ឋអនាធិបតេយ្យ បានសាងសង់រោង ខ្ទម ឬផ្ទះលើដី របស់គាត់ ហើយរដ្ឋបាលស្រុក បានឱ្យក្រុមការងារចុះទៅឃាត់ ប៉ុន្ដែបងប្អូនប្រជាពលរដ្ឋយើង មិស្ដាប់ទេ នៅតែបន្ដការសាង សង់រោង ខ្ទម ឬផ្ទះ រហូតដល់មានការប៉ះទង្គិចគ្នារហូតមានរបួស្នាមខាងភាគីលោកស្រី ខៃ ណារិន ហើយបានរត់គេខខ្លួន ក្រោយមកត្រូវបានសមត្ថកិច្ចនគរបាលឃាត់ខ្លួនជនបង្ក និងមធ្យោបាយធ្វើដំណើរ។ ដោយឡែកខាងភាគីប្រជាពលរដ្ឋ ដែលថា បានប្ដឹងមកអាជ្ញាធរស្រុកនោះ គឺមិនមានទេ គឺគាត់ បានប្ដឹងទៅប៉ូលីលអធិការស្រុក តែកន្លងមកនេះ រដ្ឋបាលស្រុក ក៍បានទទួលទូរស័ព្ទ ដែលប្រជាពលរដ្ឋ បានប្ដឹងមកដែរ ហើយរដ្ឋបាលស្រុក បានណែនាំឱ្យគាត់ដាក់ពាក្យមក (លិខិតស្នាម ពក្យបណ្ដឹង មានឯកសារអ្វីសូមដាក់មកជាមួយ) ដើម្បីក្រុមការងារចម្រុះរបស់រដ្ឋបាលស្រុកចុះពិនិត្យ និងដោះស្រាយ។

រីឯកលោកមេប៉ុស្ដិ៍នគរបាលរដ្ឋបាលឃុំកែវផុស បានឱ្យដឹងថា ប្រជាពលរដ្ឋ ដែលមានទំនាស់ដីធ្លីជាមួយលោកស្រី ខៃ ណារិន ខាងលើខ្លះមករស់នៅយូរមកហើយ និងខ្លះទៀតទើបមកតាំងទីលំនៅថ្មីៗ។ ប្រជាពលរដ្ឋខាងលើ ធ្លាប់ទូរស័ព្ទមកប្ដឹងនឹង លោកដែរពេលមានទំនាស់ជាមួយលោកស្រី ខៃ ណារិន ហើយលោកបានចង្អុលបង្ហាញថា ទាក់ទិននឹងវិវាទដីធ្លី សូមបងប្អូន ទៅប្ដឹងឃុំ និងស្រុកទើបត្រូវ ខាងកម្លាំងលោកចាំតែសហការជាមួយរដ្ឋបាលស្រុកទេ។

គួរបញ្ជាក់ផងដែរថា ទីតាំងដីមានទំនាស់ខាងលើ គឺអាចស្ថិតនៅជាដីគម្របព្រៃឈើនៅឡើយ ព្រោះពុំទាន់ឃើញមានឯកសារកាត់ ឆ្វៀលចេញពីដីសាធារណៈរបស់រដ្ឋទេ ប៉ុន្តែភាគីខាងលោកស្រី ខៃ ណារិន មានលិខិតប្រមូលទិញដីទំហំជាង ៥០ហិកតា ព្រមជាមួយនឹងលិខិតបញ្ជាក់កាន់កាប់ និងប្លង់ប៉េវេ(PV) តាំងពីឆ្នាំ២០០៥ ដោយឡែកគូភាគីប្រជាពលរដ្ឋ ពុំបានបង្ហាញ នូវឯកសារកាន់កាប់អ្វីទេ គ្រាន់តែអះអាងថាពួកគាត់បានទិញដីកំពុងមានទំនាស់ហ្នឹងតពីគេក្នុងអំឡុងឆ្នាំ២០០០ប្លាយមក៕ ដោយ៖ កូននាគខ្មៅ