ខេត្តព្រះសីហនុ៖ មហាជនបានលើកឡើងជាចម្ងល់ថា នៅតាមបណ្ដោយឆ្នេរព្រែកត្រែង ឃុំអូរត្រេះ ស្រុកស្ទឹងហាវ ខេត្តព្រះសីហនុ គេឃើញមានការហ៊ុំព័ទ្ធជារបងថ្មរឹងមាំចាប់ពីរោងចក្រប្រេងកាតមកស្ពានព្រែកត្រែង ដោយកំពុងមមាញឹកក្នុងការចាក់របងថ្មព័ទ្ធយកដីធ្វើជាកម្មសិទ្ធិឯកជនយ៉ាងអានាធិបតេយ្យ ដែលបង្កឡើងដោយបុគ្គលមានអំណាចធំៗជាច្រើនរូប ពលរដ្ឋឆ្ងល់ថា ហេតុអ្វីដីសាធារណៈរបស់រដ្ឋ ដែលម្ខាងជាដីចំណីផ្លូវ និងម្ខាងទៀតជាដីចំណីឆ្នេរ បែរទៅជាហ៊ុំព័ទ្ធរបងយកដីជាកម្មសិទ្ធិឯកជនសម្រាប់បុគ្គលខ្លួនឯងទៅវិញ?។
បើតាម លោក ហាក់ ម៉េង មេឃុំអូរត្រេះ ស្រុកស្ទឹងហាវ បានប្រាប់សារព័ត៌មានយើងតាមទូរស័ព្ទថា តំបន់ហ្នឹងខ្លះមានប័ណ្ណកម្មសិទ្ធិ ខ្លះអត់មានទេ ហើយឥឡូវបើតាមលោកអភិបាលនិយាយថា ចង់កាត់ទៅជាសង្កាត់លេខ១វិញហើយ។
ដោយឡែក លោក ហាក់ វីយ៉ា ប្រធានភូមិបាលស្រុកស្ទឹងហាវ មានប្រសាសន៍ប្រាប់សារព័ត៌មាន VD7news យើងនៅ រសៀលថ្ងៃទី ០៤ ខែមករា ឆ្នាំ ២០២១ថា ដីតាមបណ្ដោយឆ្នេរហ្នឹងមិនមានប័ណ្ណនោះទេ មានតែកន្លែងដាក់ខ្សាច់ហ្នឹងទើបមានប័ណ្ណប្រហែលជា ២ប័ណ្ណប៉ុណ្ណោះទេ ក្រោយមកគឺគេឈប់ចេញឲ្យទៀតទៅ។
ចំណែក លោក ឆាយ សុគន្ធដា អភិបាលស្រុកស្ទឹងហាវ ក៏បញ្ជាក់ប្រាប់សារព័ត៌មានយើងផងដែរថា កន្លែងខ្លះមានប័ណ្ណកម្មសិទ្ធិ ប៉ុន្តែកន្លែងខ្លះទៀតគឺអត់មានទេ កន្លែងដែលមានពីមុនគេឲ្យក្រុមប្រឹក្សា សង្កាត់ធ្វើអីៗនៅទីនោះ ក្រោយមកក៏ទុកចោលអញ្ចឹងទៅ ពិសេសមានប័ណ្ណនៅតែតំបន់ពយៗទេ។
បញ្ហានេះ លោក អុី ធារិន្ទ នាយកទីចាត់ការអន្តរវិស័យសាលាខេត្តព្រះសីហនុក៏ប្រាប់សារព័ត៌មានយើងនៅ ព្រឹកថ្ងៃទី ០៥ ខែមករា ឆ្នាំ ២០២១នេះផងដែរថា លោកអរគុណសម្រាប់ព័ត៌មាននេះ លោកនឹងរាយការណ៍ជូនថ្នាក់ដឹកនាំដេីម្បីសុំមតិដឹកនាំ។ ខេត្តបានឱ្យមន្ទីរ ដែនដីចុះពិនិត្យហេីយ។
ជុំវិញនិងដីឆ្នេរសាធារណៈរបស់រដ្ឋគឺបានគ្រប់គ្រងដោយរដ្ឋបាលខេត្ត និងគណកម្មការឆ្នេរ មហាជនក៏ដូចជាប្រជាពលរដ្ឋចង់ឃើញឲ្យមានការអនុវត្តពីថ្នាក់ដឹកនាំ ប្រកបដោយតម្លាភាព ពិសេស ឯកឧត្ដម អភិបាល នៃគណៈអភិបាលខេត្តព្រះសីហនុ ដែលលោកជាគណ:បញ្ជាការឯកភាពខេត្ត៕ ដោយ៖ អ៊ង នី
Discussion about this post