ហ្គេមបាញ់ត្រីនៅសង្កាត់ចាក់អង្រែលើកំពុងតែបើកលេងយ៉ាងរលូនខណ:ពេលដែលមិនមានសមត្ថកិច្ចណាម្នាក់ចុះបង្ក្រាប​

ភ្នំពេញ ៖ ទីតាំងហ្គេមបាញ់ត្រីមួយកន្លែងនៅក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ និងមួយកន្លែងទៀតនៅតាមបណ្តោយផ្លូវ៦០ម៉ែត្រ ក្បែរអាគារភ្លោះពីរក្នុងសង្កាត់ ខណ្ឌមានជ័យតែមួយ ដែលគេស្គាល់ច្បាស់ថាម្ចាស់ទីតាំងមានឈ្មោះ(រឿង)កំពុងតែបើកលេងយ៉ាងពេញបន្ទុកទាំងយប់ទាំងថ្ងៃធ្វើអោយពលរដ្ឋដែលរស់ក្នុងតំបន់នោះកំពុងតែមានការព្រួយបារម្មណ៍ និងមានការភ័យខ្លាចចំពោះសន្តិសុខសុវត្ថិភាពរបស់ពួកគាត់។

បើយោងតាមសេចក្តីរាយការណ៍ពីពលរដ្ឋមួយចំនួន ដែលរស់នៅក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ បានសំដែងនូវការមិនពេញចិត្តនិងព្រួយបារម្មណ៍ចំពោះសន្តិសុខ សុវត្ថិភាព ហើយនិងកូនៗ របស់ពួកគាត់ព្រោះថាបើតំបន់ណាមានបើកលេងល្បែងស៊ីសងហើយទីនោះមិនយូរទេនឹងអាចកើតមានអំពើរចោរកម្មផ្សេងៗជាក់ជាមិនខាន ជាពិសេសនឹងអាចបង្វក់ដល់ក្មេងៗយុវវ័យបាត់បង់ការសិក្សា គេចសាលាចូលលេងល្បែងហ្គេមបាញ់ត្រីនេះ។

ប្រភពដដែលបានបន្តថា រាល់ថ្ងៃនេះពួកគាត់សង្កេតឃើញថាមានក្រុមក្មេងយុវវ័យប្រុស ស្រី ជាច្រើន(ស្ទាវ)ដែលចេញចូល មកលេងហ្គេមបាញ់ត្រីនេះ ហើយភាគច្រើនជាក្មេងស្ទាវញៀនថ្នាំផង ហេតុដូច្នេះសូម សំណូមពរដល់អាជ្ញាធរមូលដ្ឋាន ជាពិសេសលោក ម៉េង វិមានតារា អធិការនគរបាលខណ្ឌមានជ័យ សូមលោកជួយមានវិធានការទប់ស្កាត់ និងធ្វើការបង្ក្រាបទីតាំងល្បែងហ្គេមបាញ់ត្រីមួយនេះផង ដើម្បីសេចក្តីសុខ សុវត្ថិភាពដល់ពលរដ្ឋ ជាពិសេសគឺសូមចូលរួមគោរពអោយបាននូវ ភូមិឃុំមានសុវត្ថិភាពទាំង៩ចំណុចរបស់ក្រសួងមហាផ្ទៃ។

ជុំវិញករណីល្បែងស៊ីសងហ្គេមបាញ់ត្រីខាងលើនេះ អង្គភាពសារព័ត៌មាន VD7 NEWS ក៏បានធ្វើការទំនាក់ទំនងទៅលោក ម៉េង វិមានតារា អធិការនគរបាលខណ្ឌមានជ័យ តែលោកបានបញ្ជាក់ថា ចាំគាត់នឹងចាត់កំលាំងអោយចុះធ្វើការស្រាវជ្រាវ និងសូមអោយពលរដ្ឋទាំងនោះទាក់ទងមកលោក ដើម្បីសហការគ្នាអោយកាន់តែច្បាស់ ដើម្បីលោកបង្ក្រាប បិទទីតាំងនោះតែម្តង៕ ដោយ: សូ សុខា