ការស៊ីណូអត់ស្លាកយីហោមួយកន្លែងត្រូវក្រុមអ្នកញាណល្បែងខ្មែរ និងវៀតណាមប្រមូលផ្ដុំគ្នាចូលលរង

ខេត្តព្រៃវែង៖ ក្រុមអ្នកញៀនល្បែងមានទាំងខ្មែរ និងវៀតណាម បានប្រមូលផ្តុំគ្នាលេងជល់មាន់នៅក្នុងកាសុីណូអត់មានស្លាកយីហោមួយកន្លែងនាព្រំដែន ច្រករបៀងស្វាយអាង៉ោង យ៉ាងគគ្រឹកគគ្រេង ផ្ទុយពីអនុសាសន៍របស់ប្រមុខរាជរដ្ឋាភិបាល ក្នុងការបង្ការការពារទប់ស្កាត់ ការឆ្លងរីករាលដាលជំងឺកូវីដ១៩ ។

ក្រុមអ្នកជល់មាន់នៅកាសុីណូអត់មានស្លាកយីហោមួយកន្លែង នៃតំបន់ព្រំដែនកម្ពុជា វៀតណាម ច្រករបៀងស្វាយអាង៉ោង ស្ថិតក្នុងឃុំចាម ស្រុកកំពង់ត្របែក ខេត្តព្រៃវែង ។

បើទោះជាប្រមុខរាជរដ្ឋាភិបាល បានប្រកាសណែនាំអោយប្រជាពលរដ្ឋទូទាំងប្រទេស ត្រូវចូលរួមអនុវត្តតាមការណែនាំ របស់ក្រសួងសុខាភិបាលយ៉ាងណាក្តី ក៏អាជ្ញាធរមូលដ្ឋាន តំបន់នោះ នៅតែបន្ដែតបណ្ដោយឲ្យក្រុមអ្នកញៀនល្បែងទាំងនោះ ប្រមូលផ្ដុំគ្នាយ៉ាងគគ្រឹកគគ្រេង ចូលលេងល្បែងស៊ីសង អត់ខ្វល់យកត្រចៀកស្តាប់និងអនុវត្តតាមដែរ។

ប្រភពព័ត៌មានពីអ្នកស្រុក ដែលរស់នៅជិតមាត់ច្រកនោះបានអោយដឹងថា ក្រុមអ្នកជល់មាន់ លេងបៀរ អាប៉ោង នៅក្នុងកាស៊ីណូអត់យីហោនោះ ១ថ្ងៃៗ មិនក្រោមពី១០០នាក់ទេ មានទាំងជនជាតិខ្មែរ និងជនជាតិវៀតណាម ដែលមិនដឹងថា មកពីណាខ្លះទេ ឃើញតែដឹកជញ្ជូនគ្នាតាមម៉ូតូ រថយន្តគ្រប់ប្រភេទ ចូលមកពពាក់ពពួនគ្នាភ្នាល់ល្បែងជល់មាន់ដាក់លុយ១គូរៗ រាប់រយរាប់ពាន់ដុល្លារ ដោយមិនខ្លាចឆ្លងជំងឺកូវីដ១៩ឡើយ។ ប្រភពបានបញ្ជាក់បន្ថែមថា កាសុីណូនេះអត់មានស្លាកយីហោ ហើយបើកលេងល្បែងសុីសង សង្ស័យអត់មានច្បាប់ទៀតផង។ ដែលមានមេការឈ្មោះ អូន និងអ្នករត់ការឈ្មោះ តី បានបើកដំណើរការជិត១ខែ មកហើយ ប្រហែលជាគេបានទំនាក់ទំនងរហូតដល់ថ្នាក់ខេត្តអស់ហើយមើលទៅ ទើបដំណើរការលេងយ៉ាងរលូនបែបនេះ។

ដោយឡែកមន្ត្រីប៉ូលីស ដែលប្រចាំការនៅមាត់ច្រករបៀង ស្វាយអាង៉ោងនោះ បានប្រាប់អ្នកសារព៌តមានអោយដឹងថា កាស៊ីណូអត់ស្លាកយីហោនេះ មិនមានពាក់ព័ន្ធជាមួយសមត្ថកិច្ចឡើយ គឺសមត្ថកិច្ចអង្គុយប្រចាំការយាមច្រកទ្វារទេ។ ប្រភពដដែលបន្តទៀតថា កាសុីណូអត់មានស្លាកយីហោនេះ បើទោះបីជាមានអាជ្ញាបណ្ណ័ច្បាប់ទម្លាប់ពិតប្រាកដមែននោះ ក៏មិនត្រូវអនុញ្ញាតិអោយមានជនជាតិខ្មែរចូលលេងល្បែងសុីសងនោះដែរ។ ពីព្រោះច្បាប់កាសុីណូ គឺអោយតែជនបរទេសចូលលេងប៉ុណ្ណោះ។ ប៉ុន្តែដំណាក់កាលជម្ងឺកូវីដ១៩ ផ្ទុះឡើងទូទាំងពិភពលោក ជាពិសេសប្រទេសកម្ពុជា ប្រមុខរាជរដ្ឋាភិបាលបានបិទមិនអោយមានការជួបជុំគ្នាលើសពី២០នាក់ ដោយកម្លាតប្រវែង១.៥ម៉ែត្រពីគ្នា។ តែផ្ទុយទៅវិញ បែរជាកាសុីណូមួយនេះហ៊ានបើកអោយអ្នកញៀនល្បែងចូលលេងរាប់រយនាក់ គួរអោយព្រួយបារម្ភនូវការឆ្លងជំងឺកូវីដ១៩ ខ្លាំងណាស់។ ប្រភពបញ្ជាក់ថា កាស៊ីណូនៅច្រកស្វាយអាង៉ោងនេះ បានបិទទ្វារដូចកាស៊ីណូដទៃទៀតមួយរយៈហើយ តែប្រហែលជាង១ខែកន្លងមកនេះ កំពូលអ្នកជល់មាន់ម្នាក់ឈ្មោះ អូន ផ្ទះនៅអ្នកលឿង បានមកទាក់ទងជាមួយបុរសម្នាក់ទៀតឈ្មោះ តី សុំជួលកាស៊ីណូនេះ បើកសង្វៀនលេងល្បែងជល់មាន់ បៀរ អាប៉ោង។ល។

ចំពោះករណីនេះ ភ្នាក់ងារយកព័ត៌មានយើង បានព្យាយាមទំនាក់ទំនងសុំការបំភ្លឺតាមទូរស័ព្ទកាលពីរសៀលថ្ងៃទី២៥ ខែធ្នូ ឆ្នាំ២០២០នេះ តែខាងសមត្ថកិច្ច ក៏ដូចជាលោក យ៉ាវ សានិន អភិបាលស្រុកកំពង់ត្របែក ប្រាប់ថា រឿងល្បែងសុីសងនៅកាសុីណូតំបន់ច្រកស្វាយអាង៉ោងនោះ ក្នុងនាមអាជ្ញាធរមូលដ្ធានរូបលោកមិនបានដឹងទេ ទោះបីជារដ្ធបាលស្រុក អញ្ជើញហៅអ្នកគ្រប់គ្រងកាសុីណូ មកជួបដើម្បីសួរនាំ ក៏គេមិនមកជួបដែរ៕ ដោយ​៖ សូរ​ សុខា​