ពលរដ្ឋចោទថា មន្រ្តីអនុវត្តច្បាប់ តែបែរជា ធ្វើផ្ទុយពីច្បាប់ ពាក់ព័ន្ធនិងការភ្ជង់យកលុយ

ខេត្តតាកែវ៖ មន្រ្តីនគបាលនៃការរិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តតាកែវ ចំនួន៤រូប បានរងការចោទប្រកាន់ថា៖ ចូលភ្ជង់សំឡុតយកលុយពីជនសង្ស័យ បានសម្រេចចំនួន៥.០០០$នៅក្នុងផ្ទះ
រួចវាយខ្នោះនាំខ្លួនជនសង្ស័យមកដល់ស្នងការខេត្ត ដោយបានជំរិតទារលុយ ពីជនសង្ស័យ បានសម្រេចចំនួន២.០០០$ បន្ថែមទៀត ជាថ្នូរនិងការដោះលែងវិញ។ នេះបើតាមជនរងគ្រោះ ឈ្មោះ ធូ ប៊ុនធឿន ភេទប្រុស អាយុ៣២ឆ្នាំ រស់នៅភូមិតាកែវ ឃុំស្រែរនោង ស្រុកត្រាំកក់ ខេត្តតាកែវ ដែលបានប្រាប់អ្នកសារព័ត៌មានយើង។ លោកបន្តថា៖ កាលពីវេលាម៉ោង១១ព្រឹកថ្ងៃទី២០ ខែធ្នូឆ្នាំ២០២០នៅក្នុងផ្ទះរបស់ជនរងគ្រោះតែម្ដង។ លោកថា មានក្រុមមន្រ្តីនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តតាកែវ ដែលស្លៀកពាក់ ឯកសណ្ឋានស៊ីវិល ចំនួន៤នាក់ ប្រដាប់ដោយកាំភ្លើង ខ្លីមួយដើម បានធាក់ទ្វាចូលផ្ទះរបស់គាត់ ហើយបានធ្វើសកម្មភាពភ្ជង់គាត់ ហើយពួកគេបានចូលរើកកាយ យកលុយគាត់អស់ ជាង៥.០០០ដុល្លារ និងបានវាយខ្នោះគាត់ បញ្ជូនទៅកាន់ស្នងការ នគបាលខេត្តភ្លាមៗតែម្ដង ។
ជនរងគ្រោះបានថ្លែងបន្តថា៖ ក្រោយពីបញ្ជូនគាត់មកដល់ស្នងការខេត្ត រួចហើយ ក្រុមមន្រ្តីនគរបាលទាំងនោះ បានឲ្យក្រុមគ្រួសារគាត់ យកលុយមកឲ្យគេចំនួន ២.០០០ដុល្លារបន្ថែមទៀត ជាថ្នូនិងការដោះលែងខ្លួនគាត់ ឲ្យមានសេរីភាពវិញ ហើយពួកគេក៏បានសម្លុតគាត់ មិនឲ្យបែកធ្លាយរឿងនេះជាដាច់ខាត ។

បើយោងតាមសម្ដី ជនរងគ្រោះបានបញ្ជាក់ថា៖ បក្ខពួកនគរបាលទាំង៤នាក់ខាងលើនោះ គាត់ស្គាល់ឈ្មោះចំនួន២នាក់ ចំណែក២នាក់ទៀត មិនស្គាល់ឈ្មោះទេ ដោយមន្រ្តី២រូប ដែលលោកស្គាល់នោះ ទី១- ឈ្មោះ ឃុត ជីង នាយរងការិយាល័យគ្រឿងញៀន។
ទី២-ឈ្មោះ ណៅ សុខសាតភក្ដី ហៅតឺម នាយរងផ្នែកការិយាល័យគ្រឿងញៀន នៃស្នងការដ្ឋាន នគរបាលខេត្តតាកែវ ។

នៅពេលសួរនាំជុំវិញករណីខាងលើនេះ លោក ណៅ សុខសាតភក្ដី នាយរងផ្នែកការិយាល័យគ្រឿងញៀន នៃស្នងការនគរបាលខេត្តតាកែវ បានប្រាប់យ៉ាងខ្លីថា លោកមិនបានដឹង ពីករណីខាងលើនេះទេ។ ចំណែក លោក សុខ សំណាង ស្នងការនគបាលខេត្តតាកែវ បានទទួលស្គាល់ថា៖ ពិតជាមានករណី នេះកើតឡើងពិតប្រាកដមែន។ ដែលករណីនេះ គឺជាការចុះទៅបង្រ្កាបគ្រឿងញៀន ដោយជនសង្ស័យត្រូវបានតាមដាន ជាយូណាស់មកហើយ។ លោកស្នងការថា រឿងនេះជាករណីចុះបង្រ្កាបគ្រឿងញៀន ក៏ប៉ុន្តែមន្រ្តីយើងមិនចុះទៅចាប់គ្រឿងញៀន បែរជាទៅចាប់ជំរិតគេយកលុយទៅវិញ រឿងនេះលោកកំពុងតែបង្កើត ក្រុមការងារឲ្យគេស្រាវជ្រាវហើយ បើរកឃើញកំហុសមែននោះ លោកនឹងដាក់វិន័យកងកំលាំង ដូចជាបន្ថយសក្តិ៍ជាដើម ហើយបើរកឃើញកំហុសធ្ងន់ធ្ងរ លោកនិងសុំគោលការណ៍ទៅលើ ដើម្បីឲ្យថ្នាក់លើជាអ្នកសម្រេចតាមនីតិវិធី។

មហាជន ក៏ដូចជាជនរងគ្រោះនៅតែបន្តរង់ចាំមើល ការអនុវត្តច្បាប់ទៅលើជនដែលប្រព្រឹត្តកំហុកធ្វើឲ្យខូចខាតបាត់បង់កិត្តិយសដល់ស្ថាប័ននគរបាលជាតិទូទាំងប្រទេសព្រោះតែបញ្ហាបែបនេះ៕ ដោយ៖ តាំង សុខន

(ព័ត៌មាន VD7NEWS យើងខ្ញុំនិងធ្វើការផ្សាយបន្តែមជុំវិញនិងករណីវិវត្តន៍នៃសាច់រឿងលំអិតបន្ត)