ខេត្តព្រះសីហនុ៖ មេការសំណង់ម្នាក់ដែលមានឈ្មោះ សុកខុម ម៉ៅការបន្តពីឈ្មោះ វណ្ណា អ្នកបកប្រែនៅក្នុងក្រុមហ៊ុន កាសុីណូ និងសណ្ឋាគារ(ខ្សាច់សរ) ភូមិ៤ សង្កាត់លេខ៤ ក្រុងព្រះសីហនុ បានផ្ដល់ព័ត៌មានមកកាន់អង្គភាពសារព័ត៌មាន VD7news យើងថា រូបលោកជាអ្នកម៉ៅការបានធ្វើការរួចរាល់រយៈពេលជាង១ខែហើយ ប៉ុន្តែខាងមេការ បកប្រែជនជាតិចិន មិនទាន់បើកលុយបង្គ្រប់ចុងក្រោយឲ្យរូបលោកក្នុងការដោះស្រាយថ្លៃកម្មករនិងជីវភាពនោះឡើយរហូតមកដល់ពេលនេះ នេះបើគិតមកដល់ថ្ងៃទី ០១ ខែធ្នូ ឆ្នាំ ២០២០។ លោកបន្តថា លុយទាំងនោះសរុបប្រហែល ១ពាន់ដុល្លារ ដោយគាត់លើកឡើងថា មូលហេតុដែលមេការមិនបើកលុយឲ្យលោក ដោយសារមានការចោទប្រកាន់មកលើរូបលោកថាបានធ្វើឲ្យ(បាត់កាតចេញចូលកន្លែងការងារ) ហើយគេកាត់ក្នុងកាតមួយ ៥០ដុល្លារ តាមគោលការណ៍របស់សណ្ឋាគារនិងកាសុីណូ (ខ្សាច់សរ)។
ឆ្លើយតបនិងការចោទប្រកាន់របស់លោក សុកខុម អ្នកម៉ៅការបន្តខាងលើ, លោក វណ្ណា ជាអ្នកបកប្រែ និងជាមេការផ្ទាល់ពីថៅកែជនជាតិចិនបានប្រាប់ព័ត៌មាន VD7news យើងនៅព្រឹកថ្ងៃទី ០១ ខែធ្នូ ឆ្នាំ ២០២០ថា មិនមែនដូចគាត់និយាយទេ លុយនៅសល់ប្រហែលជា ៦-៧០០ដុល្លារ ប៉ុណ្ណោះ ហើយនៅក្នុងច្បាប់ក្រុមហ៊ុន គេតម្រូវឲ្យយើងធ្វើកាត កន្លែងគេហ្នឹងតឹងតែង ដោយក្នុងកាត១ គេកាត់លុយ១០ដុល្លារ ហើយបើបាត់កាតហ្នឹងគេកាត់លុយ ៥០ដុល្លារ ស្រាប់តែបន្ទាប់មកគាត់បានធ្វើឲ្យបាត់កាតគេអស់រលីង ហើយគាត់បានធ្វើថ្មីឲ្យគេ ប៉ុន្តែគេមិនទទួលយកទេ (ដោយសារគាត់ធ្វើកាតអាក្លែងក្លាយ) យកទៅឲ្យគេ កាតក្លែងក្លាយគេអត់ទទួលយកទេ ហើយគេនិយាយថា អ្នកឯងយកកាតឲ្យគេមក ទើបគេបើកលុយឲ្យ។ លោក វណ្ណា បន្តថា គាត់ហ្នឹងរអ៊ូច្រើននិយាយអត់ប្រយោជន៍។ លោកបញ្ជាក់ថា សម្រាប់គោលការណ៍បើកលុយ គេនៅតែបន្តបើកឲ្យរហូតទេ ប្រសិនបើគាត់យកកាតមកឲ្យគេវិញ។
ពាក់ព័ន្ធនិងបញ្ហានេះ លោក ឡុង ជាមេការម្នាក់ទៀតធ្វើការនៅក្នុងកាសុីណូខាងលើ ក៏បានលើកឡើងផងដែរប្រាប់ព័ត៌មានយើងថា រូបគាត់ក៏មិនទាន់បានបើកលុយដូចគ្នាផងដែររយៈពេលយូរមកហើយ។ ចំណែកកាតដែលកម្មករធ្វើឲ្យបាត់បង់គាត់មិនដឹងច្បាស់លាស់ពីច្បាប់ក្រុមហ៊ុនទេ គាត់ដឹងតាមរយៈមេការចិនដែរថា បើមានការបាត់កាតគេតម្រូវឲ្យកាត់លុយសងតែ ១០ដុល្លារទេក្នុងកាតមួយស្លឹក បាត់ក៏ដោយមិនបាត់ក៏ដោយ នេះជាការលើកឡើងរបស់មេការឈ្មោះ ឡុង ដែលបានការបញ្ជាក់ដោយផ្ទាល់ពីមេការជនជាតិចិន។
ជុំវិញនិងបញ្ហានេះ លោក យ៉ូវ ខេមរា ប្រធានមន្ទីរការងារ និងបណ្ដុះបណ្ដាល វិជ្ជាជីវៈខេត្តព្រះសីហនុបានប្រាប់សារព័ត៌មាន VD7news យើងថា ពាក់ព័ន្ធនិងការម៉ៅការហ្នឹងវាមិនស្ថិតនៅក្នុងច្បាប់មន្ទីរការងារទេ ការម៉ៅការពាក់ព័ន្ធនិងច្បាប់ទំនុកចិត្ត រឿងនេះទាល់តែគាត់ប្ដឹងទៅ អាជ្ញាធរមានសមត្ថកិច្ច ឬប៉ូលិស មន្ទីរការងារទទួលដោះស្រាយតែរឿងប្រាក់ឈ្នួលប៉ុណ្ណោះ។ (នេះជាការបញ្ជាក់យ៉ាងច្បាស់លាស់ពីប្រធានមន្ទីរការងារខេត្តព្រះសីហនុ)។
បញ្ហានេះលោក សុក ខុម ប្រាប់ថាមិនមានកិច្ចសន្យាការងារនោះទេជាមួយខាងមេការ លោកក៏បានស្នើសុំកិច្ចអន្តរាគមន៍ពីសមត្ថកិច្ចប៉ុស្តិ៍សង្កាត់លេខ៤ផងដែរ ប៉ុន្តែដោយសារលោកមិនបានធ្វើកិច្ចសន្យាការងារពីមុន លោកក៏បាន សំណូមពរដល់សមត្ថកិច្ចពាក់ព័ន្ធ និងខាងមេការជួយពន្លឿនការបើកប្រាក់ថ្លៃកម្លាំងពលកម្មដែលកម្មករនិងលោកខំធ្វើការរហូតរួចរាល់ សូមកុំឲ្យមានការកាត់លុយថ្លៃបាត់កាតយ៉ាងដូច្នេះអី។
បើតាមលោក សំ ប្រាក់ វរសេនីយ៍ឯក ប៉ុស្តិ៍សង្កាត់លេខ៤ ក៏បានបញ្ជាក់ប្រាប់ VD7news យើងនៅល្ងាចថ្ងៃទី ០១ ខែធ្នូ ឆ្នាំ ២០២០ថា ដល់តែខាងភាគីអ្នកម៉ៅការយកកិច្ចសន្យាការងារមកដាក់ពាក្យបណ្ដឹង ព្រោះការរំលោភលើទំនុកចិត្តមិនអាចធ្វើការលើកឡើងបានទេ បើមិនមានឯកសារច្បាស់លាស់។ រឿងនេះលោកមិនទាន់បានទទួលដំណឹងពីអ្នកម៉ៅការទាំងនោះទេ៕ ដោយ៖ VD7NEWS
Discussion about this post