កិច្ចប្រជុំ​ការ​ពន្លឿន​ការ អ៊ុតកៅស៊ូ លើផ្លូវ​ ៣០ខ្សែ ក្នុងខេត្ត​ព្រះសីហនុ​ និង​ត្រូវ​ចាប់ផ្ដើម​

ខេត្តព្រះសីហនុ៖​ ផ្លូវបេតុងជាង ៣០ខ្សែនៅក្នុងខេត្ដព្រះសីហនុ នឹងត្រូវអ៊ុតកៅស៊ូបេទីមនៅដើមខែធ្នូនេះ ស្របតាម​ផែនការដែលបានគ្រោងទុក នៅសាលាខេត្ដព្រះសីហនុ នារសៀលថ្ងៃពុធ ១០កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៥ ខែវិច្ឆិកា ឆ្នាំ២០២០ អភិបាល នៃគណៈអភិបាលខេត្តព្រះសីហនុ ដឹកនាំកិច្ចប្រជុំជាមួយក្រុមហ៊ុន ស្ថាបនាផ្លូវ ទាំង៣៤ខ្សែ និងក្រុមហ៊ុនអ៊ុតកៅស៊ូបេទីមផ្លូវក្នុងក្រុងព្រះសីហនុ ដោយមានការចូលរួមពីលោកអភិបាលរងខេត្ត លោកនាយករដ្ឋបាល សាលាខេត្ត អភិបាលក្រុងស្រុក មន្ទីរពាក់ព័ន្ធ និងនាយកទីចាត់ការសាលាខេត្តផងដែរ។

នៅក្នុងឱកាសនោះ ឯកឧត្តម គួច ចំរើន អភិបាល នៃគណៈអភិបាលខេត្ត បានមានប្រសាសន៍ថា ដោយមានការឯកភាព ពីឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណ:កម្មា ធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានអនុញ្ញាតកិច្ចប្រជុំនេះ ដើម្បីឱ្យក្រុមការងាររៀបចំអ៊ុតបេទីមលើផ្លូវ ទាំង ៣៤ខ្សែ ក្នុងខេត្តព្រះសីហនុ ហើយគម្រោងនេះ នឹងចាប់ផ្តើមនៅថ្ងៃទី០២ ខែធ្នូ ឆ្នាំ២០២០ខាងមុខ។ ដូច្នេះក្រុមហ៊ុន ស្ថាបនាផ្លូវ និងក្រុមហ៊ុនអ៊ុតកៅស៊ូបេទីម អាចដំណើរការបានតាមកិច្ចសន្យារវាងរដ្ឋបាលខេត្ត ជាមួយក្រុមហ៊ុនអ៊ុតបេទីមទាំង ០៣ក្រុមហ៊ុន ជំហានដំបូងយើងធ្វើការអ៊ុតបេទីមលើខ្សែផ្លូវធំៗជាមុន និងបន្តទៅខ្សែផ្លូវផ្សេងៗទៀតតាមផែនការ និងពេល វេលា ដែលបានគ្រោងទុក។ សូមក្រុមហ៊ុនស្ថាបនាផ្លូវបេតុងទាំងអស់ ត្រូវធ្វើការសំអាតខ្សែផ្លូវ ដើម្បីបង្កលក្ខណៈងាយស្រួល ឱ្យក្រុមហ៊ុនអ៊ុតកៅស៊ូបេទីម មានលទ្ធភាពបំពេញការងារតាមផែនការបានរលូន ព្រមទាំងសំណូមពរឱ្យក្រុមហ៊ុនទាំងអស់ គឺក្រុមហ៊ុនស្ថាបនាផ្លូវ និងក្រុមហ៊ុនអ៊ុតបេទីម ត្រូវសហការគ្នាដើម្បីឱ្យដំណើរការស្ថាបនា និងអ៊ុតបេទីមធានាបាននូវបរិមាណ គុណភាព និងសោភណ្ឌភាពក្នុងខេត្តព្រះសីហនុ ដើម្បីបំរើឱ្យវិស័យទេសចរណ៍ និងវិនិយោគ។

ឯកឧត្តម បញ្ជាក់ថា ក្រុមហ៊ុនទាំង ០៣ ដែលទទួលអ៊ុតបេទីម រួមមាន៖ ១.ក្រុមហ៊ុន CCES Engineering Services Co., LTD ទទួលបានផ្លូវចំនួន០៥ខ្សែ។ ២.ក្រុមហ៊ុន TCM Engineering Co., LTD ទទួលបានផ្លូវចំនួន១២ខ្សែ និង៣.ក្រុមហ៊ុន LS Construction (Lee Service Cambodia) PTC., LTD ទទួលបានផ្លូវចំនួន ១៧ខ្សែ។ សម្រាប់កិច្ចប្រជុំពិភាក្សានេះ មិនទាន់បានឯកភាពសម្រេចតាមផែនការមេ ដែលបានធ្វើបទបង្ហាញនៅឡើយទេ ដោយមានបញ្ហាបច្ចេកទេសខ្លះ ដែលត្រូវ ពិភាក្សាលម្អិត និងឆ្លងយោបល់ជាមួយឯកឧត្ដមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណ:កម្មា ធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា សិនរួចហើយនឹងចាប់ផ្ដើម ដំណើរការអ៊ុតកៅស៊ូបេទីមតាមកាលកំណត់នៅថ្ងៃទី០២ ខែឆ្នូ ឆ្នាំ២០២០នេះ ដូចដែលបានគ្រោងទុក៕