ផ្លូវលេខ ២០០ ជុំវិញមន្ទីរពេទ្យបង្អែកក្រុងព្រះសីហនុ ត្រូវបានរដ្ឋបាលខេត្តបើកកិច្ចប្រជុំសម្រេចហើយ

ខេត្តព្រះសីហនុ៖ កិច្ចប្រជុំដោះស្រាយការរៀបចំផ្លូវលេខ ២០០ ស្ថិតក្នុងសង្កាត់លេខ៤ (ផ្លូវក្រោយមន្ទីរពេទ្យបង្អែក) ក្រុងព្រះសីហនុ ក្រោមអធិបតីភាព ឯកឧត្តម គួច ចំរើន អភិបាល នៃគណៈអភិបាល ខេត្តព្រះសីហនុ។ កិច្ចប្រជុំនេះរៀបចំឡើងកាលពីវេលាម៉ោង ០៨:៣០ នាទីព្រឹកថ្ងៃទី២៥ ខែវិច្ឆិកា ឆ្នាំ២០២០ នៅសាលាខេត្តព្រះសីហនុ។

ឯកឧត្ដម គួច ចំរើន អភិបាល នៃគណៈអភិបាលខេត្តព្រះសីហនុមានប្រសាសន៍បើកអង្គប្រជុំថា មន្ទីរពេទ្យដើរតួនាទីយ៉ាងសំខាន់ទៅលើវិស័យសុខាភិបាល នៅក្នុងខេត្តព្រះសីហនុ ថ្មីៗនេះរាជរដ្ឋាភិបាលបានសាងសង់មន្ទីរពិសោធន៍ដើម្បីស្របតាមជំងឺរាតត្បាត កូវីដ១៩ និងជំងឺផ្សេងៗទៀត នៅក្នុងមន្ទីរពេទ្យបង្អែកយើងនេះ អញ្ចឹងការរៀបចំហេដ្ឋារចនាសម្ពន្ធនៅជុំវិញមន្ទីរពេទ្យពិតជាមានការ ចាំបាច់ណាស់ តម្រូវឲ្យយើងអស់គ្នារួមគ្នាគិត រួមគ្នាដោះស្រាយ ដើម្បីប្រយោជន៍ខេត្តយើងទាំងអស់គ្នា។

ឯកឧត្ដមបន្តថា ការអភិវឌ្ឍផ្លូវលេខ ២០០នេះពិតជាមានសារ:ប្រយោជន៍សំខាន់ណាស់ ដើម្បីសោភ័ណភាពនិងភាពងាយស្រួលដល់ពលរដ្ឋមកទទួលសេវាសុខភាព។ ឯកឧត្ដមបន្តថា លោកពិតជាមានការចាប់អារម្មណ៍ណាស់ផលរបរដែលនៅទីនោះ មិនត្រឹមតែចាប់យកដីទីតាំងសាធារណ:ដើម្បីយកទៅប្រើប្រាស់ជាប្រយោជន៍បុគ្គលនោះទេ នៅទីនោះក៏បានបង្កឲ្យប៉ះពាល់ដល់កិត្តិយសក្រុងព្រះសីហនុយើងផង សេចក្ដីថ្លៃថ្នូររបស់ស្ត្រីផង ដែលកំពុងបម្រើសេវាកម្ម ភ្លើងពណ៌ក្រហមព្រោងព្រាត លោកមិនដឹងថា ការធ្វើដំណើរតាមម៉ូតូត្រូវគេបោចគេទាញយ៉ាងណានោះទេ លោកមិននឹកស្មានថា នៅជុំវិញមន្ទីរពេទ្យត្រូវបានគេយកទៅបម្រើសេវាកម្មដ៏ស្មោករោគយ៉ាងនេះសោះ មានមួយចំនួនមិនមែនទាំងអស់នោះទេ។

ឯកឧត្ដមបញ្ជាក់ថា ការដោះស្រាយនៅទីនេះមាន ៤ចំណុច៖

ទី១- ហេដ្ឋារចនាសម្ពន្ធ (ផ្លូវជុំវិញមន្ទីរពេទ្យ)
ទី២- បម្រើឲ្យវិស័យសុខាភិបាល
ទី៣- សោភ័ណភាពទីក្រុងព្រះសីហនុ
ទី៤- យប់ឡើងមានការបង្កប់សេវាបោយដៃជាច្រើន អាចនិងលើសពី ១០ទីតាំង (គាត់បានធ្វើឲ្យប៉ះពាល់ដល់សេចក្ដីថ្លៃថ្នូរស្ត្រីខ្មែររបស់យើង ដែលបានយកចិញ្ចើមផ្លូវសាធារណៈប្រើប្រាស់លើសេវាទាំងនោះ) ឯកឧត្ដមថ្លែងថា (យប់មុនចង់បោយដៃដោយទាំងចៅហ្វាយខេត្តទៀតផង)។

បើតាមរបាយការណ៍របស់រដ្ឋបាលក្រុងព្រះសីហនុ ដែលធ្វើការបញ្ជាក់ដោយ លោក អុី សុខឡេង អភិបាលក្រុង ក្នុងការចុះស្រង់ស្ថិតិការរស់នៅជាប់ផ្លូវ ចំណុចផ្លូវលេខ ២០០ មាន ផ្ទះដែលមានមនុស្សរស់នៅអចិន្ត្រយ៍ ២៥គ្រួសារ។ ផ្ទះកំពុងជួល ៣៥គ្រួសារ, ផ្ទះបិទទ្វារចោល និងដាក់ស្លាកជួល ៣០គ្រួសារ, ផ្ទះដែលចិនទិញ ៣ខ្នង, ដីទំនេរ ដែលមិនទាន់មានផ្ទះ ២ទីតាំង, សំណង់គ្រោងដែក ២ទីតាំង, សំណង់បេតុងអាមេ ២ទីតាំង, (សរុបចំនួនខ្នងផ្ទះ និងគ្រួសារ ១២៨ខ្នងផ្ទះ, ស្មើនិង ១៥៣គ្រួសារ)។

អង្គប្រជុំក៏បានលើកយក ច្បាប់ភូមិបាល មាត្រា ៧១ ចែងថា ត្រូវចាត់ទុកជាការរំលោភកាន់កាប់ទ្រព្យសម្បត្តិរបស់រដ្ឋ អចលនទ្រព្យដោយខុសច្បាប់ ការចូលកាន់កាបទ្រព្យសម្បត្តិរបស់រដ្ឋជាភោគៈ ក្រោមច្បាប់ភូមិបាលឆ្នាំ ២០០១ចូលជាធរមាន ការចូលកាន់កាប់អចលនទ្រព្យរបស់រដ្ឋដោយខុសច្បាប់ដែលត្រូវបានកំណត់រួចហើយ និងសាធារណៈរបស់រដ្ឋ ទោះជាមុន ឬក្រោយច្បាប់ភូមិបាលចូលជាធរមាន។
មាត្រា ៧១ និង មាត្រា ៧២ ដែលមានទោសកំណត់ក្នុង មាត្រា ៨១ រាល់ការរំលោភកាន់កាប់ទ្រព្យសម្បត្តិរបស់រដ្ឋជាអចលនទ្រព្យដោយខុសច្បាប់ ដែលចែងក្នុងមាត្រា ៧១ ត្រូវផ្ដន្ទាទោស ដាក់ពន្ធនាគារពី ២ឆ្នាំ ដល់ ៥ឆ្នាំ និងពិន័យជាប្រាក់ពី ៥លានរៀល ដល់១០លានរៀល។

ជាចុងក្រោយ កិច្ចប្រជុំបានកណត់ថា រដ្ឋបាលខេត្តព្រះសីហនុ និងចេញលិខិតជូនដំណឹងរាល់អ្នកដែលរស់នៅនិងមានដីជុំវិញ មន្ទីរពេទ្យបង្អែកចំការចេក ក្រុងព្រះសីហនុ និងត្រូវចូលរួមប្រជុំដោះស្រាយនាពេលឆាប់ៗខាងមុខនេះ នៅមុនដាច់ឆ្នាំ ២០២០៕ ដោយ៖ អ៊ង នី