រង្វង់មូលតោ២ដែលជានិមិត្តរូបខេត្តព្រះសីហនុ អាចនិង​មាន​ការ​កែលំអ​សួនច្បារ​ សម្រាប់​សោភ័ណ​ភាព​បន្ថែម​

ខេត្តព្រះសីហនុ៖ ឯកឧត្តម គួច ចំរើន អភិបាល នៃគណៈអភិបាល ខេត្តព្រះសីហនុ បានដឹកនាំមន្ត្រី មន្ទីរអង្គភាពជំនាញ រួមទាំងលោកអភិបាលក្រុងព្រះសីហនុ និងរដ្ឋបាលក្រុងព្រះសីហនុ ព្រមទាំងតំណាងក្រុមហ៊ុនចុះពិនិត្យមើលការអភិវឌ្ឍន៍ នៃហេដ្ឋារចនាសម្ព័ន្ធការស្ថាបនាផ្លូវទាំង ៣៤ខ្សែ ព្រមទាំងប្រព័ន្ធលូ អូរ ប្រឡាយ អាងប្រព្រឹត្តកម្ម ការសាងសង់បន្ទប់ទឹកសាធារណ:តាមបណ្តោយឆ្នេរអូរឈើទាល កែលំអ​សួនច្បារ​ជាប់​រង្វង់មូល​តោ២​ និងការរៀបចំក្រាលថ្មក្រានិតនៅតាមចិញ្ចើមផ្លូវជុំវិញតោពីរក្នុងក្រុងព្រះសីហនុ ការចុះពិនិត្យមើលខាងលើនេះនៅព្រឹកថ្ងៃច័ន្ទ ៨កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៣ ខែវិច្ឆិកា ឆ្នាំ២០២០។

ហើយនាឱកាសនោះឯកឧត្តម គួច ចំរើន អភិបាលខេត្តព្រះសីហនុ បានធ្វើការណែនាំដល់បណ្ដាក្រុមហ៊ុនសាងសង់ផ្លូវត្រូវយកចិត្តទុកដាក់ ដោយទទួលខុសត្រូវខ្ពស់ក្នុងការពន្លឿនការងារឱ្យបានឆាប់រហ័ស ធានាបានបរិមាណនិងគុណភាព សោភ័ណភាព ដោយមិនត្រូវទុក កាកសំណល់ការដ្ឋាននៅលើដងផ្លូវធ្វើឱ្យបាត់បង់សោភណ័ភាពក្នុងក្រុង និងត្រូវឱ្យហើយ នៅមុនចូលឆ្នាំខ្មែរប្រពៃណី ។ ក្នុងនោះផងដែរឯកឧត្តម គួច ចំរើន អភិបាល នៃគណៈអភិបាល ខេត្តព្រះសីហនុ ក៏បានធ្វើការអំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិដែលមកលេងកម្សាន្តតាមតំបន់ឆ្នេរ និងតាមរមនីយដ្ឋាននានា ក្នុងខេត្តព្រះសីហនុ ចូលរួមសហការថែរក្សាបរិស្ថានអនាម័យ ទន្ទឹមនោះធ្វើការណែនាំដល់ក្រុមការងារ និងមន្ត្រីជំនាញ សរសេរអក្សរលើថ្មម៉ាបដាក់តាមសួនច្បារ តំបន់ឆ្នេរ “ហាមបោះចោលសំរាម” ប្រសិនបើមានករណីរំលោភបំពាន និងត្រូវផាកពិន័យតាមអនុក្រឹត្យលេខ១១៣ មាត្រា៤៣ ស្តីពីការផាក ពិន័យអន្តរកាលចាប់ពី ២០.០០០រៀល ទៅ ៤០០.០០០រៀល ។

សូមបញ្ជាក់ថានៅក្នុងឆ្នាំ១៩៦២ សម្តេចព្រះនរោត្តម សីហនុ បានកសាងរូបសំណាកសត្វ«តោញី ឈ្មោល» ដែលជាប្រភេទស្តេចសត្វម្រឹគី ម្រឹគា មួយគូកំពុងតែឈរបង្អួតខ្លួនដោយអំណាច ជាតំណាងឲ្យខេត្តព្រះសីហនុសក្តិសមទៅនឹងព្រះកិត្តិនាមដែល ព្រះបរមរតនកោដ្ឋ បានកសាងទុកឲ្យកូនចៅ ចៅទួតរបស់ព្រះអង្គ ភ្ញៀវទេសចរជាតិ និងអន្តរជាតិបានទស្សនា និងផ្តិតយករូបភាពដែលជាសមិទ្ធផលក្រោមស្នាព្រះហស្ថរបស់ព្រះអង្គក្នុងការបង្កើតខេត្តព្រះសីហនុនេះឡើង៕